Nga Gjergj Vyshka

Nuk e zgjidh situatën tuaj të rëndë kërkesa ndaj gazetarëve për t’i thënë nëse e ka bërë mirë, apo keq, punën e tij. Përkundrazi mundohuni të mos i mbuloni problemet e të mos ia mbyllni gojën të tjerëve…

Për të ardhur keq, por në Federatën Shqiptare të Basketbolli, pas çdo gjëje të botuara nëpër media, që nuk i ka ardhur pas “oreksit” të drejtuesve të koshit shqiptar, të tingëllojnë telefonat për të thënë dhe për të dhënë mendje nëse ishte mirë, apo ishte keq. E në të tilla kushte, s’ka mbetur gjë tjetër, por ne si gazetar, pas lejes nga drejtuesit e gazetave tona, duhet të marrim dhe një leje tjetër, pse jo dhe një “vizë”, për të pyetur Federatën Shqiptare të Basketbollit se çfarë duhet të shkruajmë ne për basketbollin shqiptar.

Ore me të vërtetë, këtë po ja kërkoj dhe lexuesve, na sugjeroni se çfarë duhet të shkruajmë ne për basketbollin… Më duket se jetojmë në demokraci, atje ku askujt nuk mund t’i mbyllet goja për të thënë atë që mendon, sidomos kur bëhet fjalë për kombëtaren e basketbollit shqiptar, e cila, për shumë e shumë arsye, mungon në kualifikueset e Kampionatit Evropian “Ukrainë 2015”.

Nëse në Federatën Shqiptare të Basketbollit kërkojnë t’i bëjnë gjërat me rreth të ngushtë, basketbolli dhe komuniteti i saj është më i gjerë. Dhe për rrjedhojë, mirë, apo keq, ka secili të drejtën të thotë mendimin e tij. Në të vërtetë kemi harruar të themi që analiza vjetore e Federatës Shqiptare të Basketbollit, e zhvilluar në Shkodër në ditët e finaleve të Kupës së Shqipërisë, meshkuj e femra, më shumë se anëtarë e delegat kishte karrige bosh (?!).

Dhe kësisoj analiza vjetore ka qenë më shumë se sa formale, ashtu siç ka qenë edhe deklarata e Komitetit Drejtues, që ka mbërritur në orët e vona të mbrëmjes të së mërkurës, atje ku më shumë justifikonte, se sa nxirrte aksione veprimi për ta rifutur kombëtaren e basketbollit përsëri në parket. Sepse dy vjet mungesë kombëtarja e meshkujve në veprimtaritë ndërkombëtare, por tre vjet kombëtarja e femrave, janë një minus i madh për Federatën Shqiptare të Basketbollit. Që as më pak e as më shumë e kthejnë atë në jo ligjore.

Një paligjshmëri e juaja është formalitet për ne për të bërë detyrën e informimit për të gjitha gjërat që nuk shkojnë në basketbollin shqiptar, qoftë dhe nëpërmjet deklaratave së të gjitha palëve pa “dallim feje, krahine dhe ideje…”. Sepse për hir të së vërtetës duhet pranuar se gjendja në basketbollin shqiptar nuk është aq rozë sa ç’kërkojnë ta bëjnë drejtuesit e basketbollit, që mundohen ta mbajnë gjithçka në një rreth të ngushtë.

Dhe atëherë kur del diçka që nuk shkon, ato që janë armiqtë më të mëdhenj të kësaj Federate, janë gazetarët. Por e nderuar Federatë, “dielli nuk mbulohet me shoshë”. Sigurisht që planet për perspektivën, apo të ardhmen e basketbollit duhet t’i kishit bërë dhe më parë. E shyqyr që jeni kujtuar se duhet dhe kombëtarja U-14, U-16 dhe U-18, megjithëse duhet të ishte për të dy sekset, ashtu sikurse duhet të ishte dhe U-20, sepse kualifikueset luhen dhe për këtë grupmoshë.

Dhe diçka, nëse financiarisht Federata Shqiptare e Basketbollit qenka si mos më keq, si ka mundësi që pranohet të merret trajner malazez për kombëtaren e gjashtëmbëdhjetëvjeçarëve, të cilët kanë nisur dhe nga përgatitjet treditore në Malin e Zi? A nuk është kosto shtesë dhe një vajtje dhjetëditore në Strumica të Maqedonisë për këto kualifikuese, kur fati i gjërave dihet ende pa hyrë në parket? Është thënë në komunikatën për shtyp të Komitetit Drejtues për një analizë të hollësishme së të gjitha kombëtareve.

Një gjë duhet pasur parasysh, analizat o bëhen menjëherë pas aktiviteteve ndërkombëtare, ose nuk bëhen fare. Dhe ka të ngjarë që edhe pas asaj deklarate për shtyp, nxitimthi në mbrëmjen e së mërkurës, të mos merret më njeri me ato që kanë ikur. Nëse duhet të vazhdojmë dhe t’i hyjmë të gjitha aktiviteteve kombëtare, që në një farë mënyre dhe ajo deklaratë e Ermal Kuqos në “Procesin sportiv” është e vërtetë kur fituesi dihet ende pa nisur kampionati, atëherë ajo çfarë duhet shkruar është shumë e gjatë.

Pasi në dy edicione, play-off i të rinjve për titull kampion ka pasur sherre dhe goditje të gjyqtarëve, por askush nuk reagon. Në garën e kampionatit, të paktën deri në sezonin e kaluar, kanë qenë të shumta raste e fyerjeve dhe goditjeve të gjyqtarëve, por askush nuk reagon. Pra një mal me probleme, që nuk gjejnë asnjëherë zgjidhje, por mbyllen shpejt e shpejt dhe këtu është kënaqësia e Federatës Shqiptare të Basketbollit, sepse duket sikur gjërat për të janë normale. Janë krejtësisht anormale, që nuk bëjnë asgjë tjetër, veçse dëmtojnë imazhin e basketbollit shqiptar.

Që ka nevojë për përmirësim e jo për mbyllje gojësh dhe fshehje të problemeve. Kështu që, edhe me të drejtën kushtetuese të informimit për popullin e thjeshtë, një lutje për Federatën Shqiptare të Basketbollit, na thoni çfarë duhet të shkruajmë për këtë sportin tuaj që lëngon prej shumë vitesh. Dhe vetëm në këtë pikë keni të drejtë, sepse lëngon i gjithë sporti shqiptar. Në të tjerat nuk ka njeri t’ju justifikojë…

Basketboll – Liga Ballkanike

Liga Ballkanike e Basketbollit në të cilën Kosova përfaqësohet me Sigal Prishtinën dhe Besën e Pejës, ndërsa nga Shqipëria nuk merr pjesë askush (nga Federata Shqiptare e Basketbollit, më së shumti nga sekretari i saj i përgjithshëm, Korab Llazani, në emisionin e së dielës “Sport Vip” në Ora Neës është thënë se nga presidenti Ponari janë vendosur 20.000 euro në dispozicion të atij ekipi që do të pranojë të marrë pjesë sezonin e ardhshëm) tashmë është rikthyer në parket.

Peja, që është dhe kampione në fuqi e basketbollit të meshkujve në Kosovë, e ka nisur vitin 2014 me fitore në Ligën Ballkanike, të paktën dhe sipas gazetës vendëse Ekspres. Kjo skuadër, në Pallatin e sportit “Karagaqi”, ka mundur të martën skuadrën bullgare Ballkan me rezultatin 79-67.

Verdhezinjtë e Pejës e kanë dominuar ndeshjen gjatë gjithë kohës, ndërsa pjesën e parë e kanë mbyllur me një avantazh prej 13 pikësh, 48-35. Kjo ishte fitorja e tretë e Pejës, e cila renditet e shtata në Ligën Ballkanike me 11 pikë. Sakaq Sigal Prishtina është mundur dje në Sofje të Bullgarisë nga Levski, 91-87. Vendësit e kanë nisur më mirë takimin, teksa kanë pasur një dominim të lehtë në fushë. Levski e ka mbyllur pjesën e parë me avantazhin 43-39.

Por në dy periodat e dyta, Sigal Prishtina bën kthesën në lojë, teksa ekipi bardhekaltër arriti ta barazojë rezultatin dhe të krijojë epërsi të konsiderueshme. Mirëpo prishtinasit e lëshuan fitoren nga duart, ndërsa 30 sekonda nga fundi i ndeshjes, Levski ka barazuar 77-77. Në shtesë vendësit kanë qenë më mirë se Sigal Prishtina, që ka bërë një ndeshje të dobët, ndërsa ka fituar Levski, 91-87. Kjo ishte humbja e tretë e Sigalit, ndërsa ka pesë fitore, teksa ka grumbulluar 13 pikë

Nga Gjergj Vyshka

Juban Danja, fituesja e dy edicioneve radhazi, duhet të mbrojë trofeun, në një kohë që Adën, kampione në fuqi të Shqipërisë, tashmë e ka zëvendësuar Vllaznia, e cila kishte fituar Kupën “Miqësia”

Futbolli i femrave në Shqipëri tashmë është gati për aktivitetin e dytë të rëndësishëm kombëtar, që është Kupa e Shqipërisë. Dhe këtë sezon, të paktën dhe sipas njoftimit që ka bërë Federata Shqiptare e Futbollit, apo dhe përgjegjësi i këtij sektori, Endi Hyka, që nga turi i parë e deri në finale gjithçka do të zhvillohet në Shkodër.

Nëse në turin e parë, atje ku marrin pjesë tetë skuadra, që do të luajnë mes tyre me sistem eliminimi direkt, do të luhet në stadiumin “Loro Boriçi” dhe në fushën e lëkurave në Shkodër, në gjysmëfinale më 1 shkurt dhe në finale gjithçka do të diskutohet vetëm në impiantin më të madh të futbollit në qytetin verior.

Për t’u evidentuar është fakti se në tre edicione, Kupa e Shqipërisë gjithnjë ka qenë provë e trevës së Shkodrës, sepse një herë e ka fituar Ada dhe dy herë të tjera Juban Danja. Që do të thotë se skuadra e financuar nga Ferdinand Jaku duhet ta mbrojë këtë trofe në kushtet kur nuk do të ketë më Adë, si tre herë kampionen e Shqipërisë, por Vllazninë, e cila e ka zëvendësuar ekipin velipojak.

Duhet kuptuar që janë po të njëjtën president që kanë financuar skuadrën velipojake, e cila ka marrë pjesë dhe Ligën e Kampioneve, ndërsa tashmë pritet që “pronare” e trofeve në futbollin e femrave të bëhet Vllaznia. Madje kjo skuadër, këtë fundjavë, ka fituar dhe Kupën Miqësia, ndërsa duket se edhe finalja e pritshme do të jetë Juban Danja-Vllaznia. Megjithëse ndonjë skuadër si Tirana AS edhe mund të bëjë surpriza.

Por duke u luajtur ky aktivitet në Shkodër gjasat janë që kjo Kupë e Shqipërisë të mbetet në kryeqendrën e Veriut, atje ku ka një numër të madh skuadrash në futboll femrash. Pas Kupës së Shqipërisë është faza e dytë, ndërsa në mes është dhe ndeshja e radhës e kombëtares së femrave, ndaj Portugalisë në transfertë, më 12 shkurt.

Nga Gjergj Vyshka

Shefi i laboratorit të kontrollit antidoping Ostreni: Në të do të jenë të ftuar të gjithë sekretarët e Federatave dhe trajnerët e kombëtareve, pa dyshim dhe Ministria e Arsimit dhe Sportit e KOKSH

Dopingu dhe lista e medikamenteve të ndaluara të vitit 2014, të shpallura nga Agjencia Botërore e Antidopingut (WADA). Kjo do të jetë tema e diskutimit në konferencën kombëtare, e cila, sipas shefit të laboratorit të antidopingut shqiptar, doktorit Mel Ostreni, do të mbahet në fund të këtij muaji. “Sigurisht – thotë Ostreni – që në të do të jenë sekretarët e federatave sportive dhe trajnerët e ekipeve kombëtare, të cilët kanë nevojë ta marrin këtë informacion.

Kjo konferencë do të jetë në bashkëpunim të plotë me Ministrinë e Arsimit dhe Sportit. Do t’i bëjmë ftesë dhe Komitetit Olimpik Kombëtar Shqiptar, meqë gjithnjë na ka ftuar në konferencat e saj. Të paktën ta nisim ne punën, në kushtet kur komisioni antidoping, që deri dje është udhëhequr nga zëvendësministri i Turizmit, Kulturës, Rinisë dhe Sporteve, nuk funksionon. Sepse ende nuk janë ngritur si duhet strukturat e sportit. Që do të thotë se duhet ta bëjmë këtë gjë, në mënyrë që nesër të mos thonë që nuk e kishim informacionin e duhur”.

Dhe duket se në fakt sporti shqiptar ka nevojë për një informacion të tillë, në kushtet kur më së shumti në peshëngritje, që nga 2011-ta e deri në 2013-ën, numërohen pesë raste dopingu, ndonëse dy tashmë janë shlyer me afatin e dënimit. Ashtu siç ka pasur tek-tuk edhe ndonjë rast në atletikë.

E thënë ndryshe sporti shqiptar nuk po i shpëton dot kësaj plage, ndaj edhe konferenca kombëtare e antidopingut, në fund të janarit, është e nevojshme për t’i njohur sekretarët e federatave shumësportëshe dhe trajnerët e ekipeve kombëtare me listën e medikamenteve të ndaluara në përdorim për 2014-ën. A do të jetë Ministria e Shëndetësisë, qoftë edhe për më shumë bashkëpunim? “Këtë – thotë Ostreni – do ta diskutojmë në atë konferencë”

Lozana, e detyrueshme për të marrë pjesë

Konferenca e radhës për antidopingun, në të cilën Shqipëria e ka të domosdoshme për të marrë pjesë, është ajo në Lozanë më 7 mars 2014. “Sepse – thotë Ostreni – ne na janë dhënë 20.000 dollarë nga EERADO (Agjencia e dopingut e Evropës juglindore), të cilat janë lëvruar dhe tashmë duhet t’i bëjmë planifikimin që t’i vëmë në punë. Ashtu sikurse na janë akorduar dhe 15 analiza antidoping falas që nuk janë pak. Dhe të gjitha këto na u dhanë në kushtet kur për vitin 2013 nuk kishim asnjë lek nga shteti si fond grant, ndërsa më 2012 një pjesë e fondit na u hoq nga ministria e Bumçit, sepse duhej për 100 vjetorin e Pavarësisë.

Tani na janë dhënë 700.000 lekë të reja. Atëherë që të konfirmojmë këto donacione nga ndërkombëtarët është e domosdoshme pjesëmarrja në Lozanë, sepse ne nuk kemi qenë as në konferencën e fundit në Afrikën e Jugut. Kemi kohë për të konfirmuar pjesëmarrjen deri më 7 shkurt, në të kundërt i djegim dhe ato fonde që duan të na japin si ndihmë ndërkombëtarët”. Gjithsesi ajo që është e rëndësishme është që do të bëhet konferenca kombëtare e antidopingut, atje ku Federata Sportive do të njihen me listën e medikamenteve të ndaluara për vitin 2014.

Nga Gjergj Vyshka

Juxhin Talelli, ish-basketbollisti i ekipit tonë kombëtar, por dhe i Kamza Basket, të paktën deri në fillimin e sezonit 2012-2013, tashmë i ka thënë boll basketbollit të luajtur. Për shkak të një dëmtimi të rëndë, që ka zgjatur për më shumë se një vit e gjysëm, por që nuk duket se jep garanci për të vazhduar karrierën për të luajtur, edhe pse dëshira ka qenë e madhe për të vijuar në parket, Talelli ka zgjedhur një tjetër rrugë. “Nuk u bë më ashtu si duhej. Kështu që nuk mund të vazhdoja më si lojtar”, thotë shkurt Talelli.

Veçse ndërhyrja miqësore e trajnerit të Tiranës në basketboll për femra, Erdal Borovës, i cili përpara se të mbërrinte te bardheblutë, në fillim të sezonit 2012-2013, ka pasur të rinjtë e Virtus Tiranës, i ka ndërruar profilin Talellit. “Nuk luan, por do të bëhet trajner, sepse ka dëshirën e mirë dhe talentin për të vijuar karrierën në basketboll si teknik. Ndaj dhe do të jetë trajneri i moshave te Virtus Tirana.

Do të mundohemi të krijojmë ekipin  e paratërinjve, por ndërkohë do të jetë ndihmës me mua tek të rinjtë”, ka thënë shkurt Borova, kurse Talelli ka pranuar se që kjo skuadër e të rinjve të jetë kampione ka shumë punë.Ndërkohë duhet pranuar se Borova, edhe për shkak të të qenit te Tirana në basketboll për femra, sezonin e kaluar, apo dhe tani nuk ka mundur të qëndronte në dy bankina. Kështu që e ka drejtuar Virtus Tiranën nga pas stolit, por që aty si trajner ka figuruar Ilir Canhas, ndërkohë që tashmë Talelli do të jetë me të në bankinën e Virtus Tiranës për më shumë orientim për ekipin.

Nga Gjergj Vyshka

 “Edhe në kampionat, por dhe në Kupën e Shqipërisë, në finalen e Shkodrës, ndihma e arbitrave ndaj Flamurtarit ka qenë skandaloze. Ndaj shpresojmë të mos përsëritet më, sepse jemi përgatitur për një finale serioze”

Flamurtari-Tirana është finalja e Superkupës në basketboll për femra, e cila të premten do të luhet në Vlorë, në ora 17:00. Ndërkohë që të mërkurën e ardhshme, tashmë në sallën sportive në Bathore, në ora 18:00 do të përballen për meshkuj Kamza Basket-Vllaznia. Duke mbetur te sfida e femrave, përballja e Flamurtarit me Tiranën, jo vetëm këtë sezon, por dhe sezonin e kaluar, i ka dhënë tonin basketbollit të vajzave, sepse ka qenë një duel për kreun e renditjes e, mbi të gjitha për trofe. Kështu ka ndodhur në finalen e Kupës së Shqipërisë në dhjetor 2012, të cilën Tirana e ka fituar 60-56. Kështu ka ndodhur në kampionat sezonin e kaluar, kur Tirana fitoi në “Farie Hoti”, 67-61.

Por e njëjta situatë është përsëritur po në “Farie Hoti”, ndërsa Flamurtari, pas dy kohëve shtesë, do të fitonte 84-94. Ndërkohë këtë sezon Flamurtari ka fituar si në kampionat, ashtu dhe në finalen e Kupës së Shqipërisë, në Shkodër, 93-60. Por në prag të kësaj ndeshje, trajneri i Tiranës, Erdal Borova, e ka një merak, që janë gjyqtarët. Sipas tij, skuadra bardheblu e përbërë nga Todoroviç, Eliverta dhe Gera Bujari, Palko, Sokoli, etj, është përgatitur seriozisht për të bërë sfidë në Vlorë dhe për të kërkuar që të luhet një ndeshje si në vitet e arta të duelit Flamurtari-Tirana.

“Ne jemi përgatitur seriozisht – thotë Borova për Gazeta e Sportit – dhe do të mundohemi që të japim më të mirën në fushën e lojës. Por gjithashtu shpresojmë që të mos përsëritet mënyra skandaloze e arbitrimit, gjë që ka qenë e dukshme jo vetëm në ndeshjen në Vlorë e kampionatit, por dhe në finalen e Kupës së Shqipërisë, në Shkodër. Në të dyja ndeshjet arbitrimi ka qenë dukshëm në favor të Flamurtarit dhe kjo tashmë është bërë gjë mëse e zakonshme”.

Në fakt, disa vite më parë, Tirana në një prej finaleve të titullit kampion në Vlorë, edhe për shkak të gjykimit, pat gjetur mënyrën e të protestuari duke ia dhënë topin kundërshtarit ose duke e lënë në vijën anësore pa e vënë në lojë. Sepse, me përjashtim të rasteve kur në Kupën e Shqipërisë, apo në kampionat, ka dalë Apolonia vitet e fundit, apo dikur Luftëtari e Skënderbeu, Flamurtari ka dominuar edhe për shkak të gjykimeve ndihmëse. Megjithatë Borova ka zbuluar dhe mënyrën se si do të luajë Tirana.

“Do të mundohemi të përdorim sulmin e shpejtë, i cili është karakteristikë e lojës së skuadrës sonë. Por mbi të gjithë të përmirësojmë dhe lojën mbrojtëse në afërsi të koshit, duke pasur parasysh që ekipi kundërshtar ka lojtare më shtatlarte se sa ne. Ndaj do të mundohemi të bëjmë gjithçka mirë, por nëse nuk do të jetë arbitri i njëanshëm, ne e sfidojmë Flamurtarin edhe në Vlorë”.

Mirënjohje e shefes së klubit shumësportësh Skënderbeu, Tatjana Marash, për zëvendëskryeministrin, ish-kryetari i Bashkisë së Korçës, Niko Peleshi, i cili ka bërë gjithçka për basketbollistin Edgar Shehi, që gjatë stërvitjes ka pësuar një dëmtim të rëndë

“Faleminderit zoti Niko!”. Kështu e ka nisur mirënjohjen e saj shefja e klubit shumësportësh Skënderbeu, Tatjana Marash, për zëvendëskryeministrin e Shqipërisë, Niko Peleshi, që deri në nëntor 2013 ka qenë kryetari i Bashkisë së Korçës. Gjithçka është rrjedhojë e asaj që ka ndodhur të hënën në mbrëmje, në Pallatin e Sportit “Tamara Nikolla” të Korçës, gjatë një seancë stërvitore të ekipit të basketbollit të meshkujve të Skënderbeut. Sipas shefes Marash, në këtë seancë stërvitore ka pësuar një traum të rëndë basketbollisti Edgar Shehi, i biri i mjeshtres së koshit korçar Lida Shehu.

“Gjatë stërvitjes së ditës së hënë – nis të tregojë Marash – gjatë një ushtrimi na është dëmtuar Edgar Shehi. Ka qenë ora 20:30, ndërsa dëmtimi i tij nuk ka qenë i lehtë, sepse në çast humbet ndjesinë te gjymtyrët e poshtme (paralizim i gjymtyrëve të poshtme). Trajneri i skuadrës, Iltian Nika, i shqetësuar për situatën e krijuar ka lajmëruar ambulancën e spitalit civil të Korçës, të cilët, në moment, kanë qenë të gatshëm për të shërbyer me korrektësi e humanizëm, ashtu siç në fakt duhet ta karakterizojë një shërbim të tillë.

Dhe në emër të klubit shumësportësh Skënderbeu i falënderoj mjekët e spitalit, jo vetëm kaq, por dhe në emër të sportistit dhe familjes, për gjithçka që bënë për rastin në fjalë. Sepse patën gatishmërinë, predispozitën për të bërë gjithçka mirë atë natë”. Dhe sipas Marash, pas 3-4 orësh ekzaminime në Korçë, por dhe pas konsultave të pesë mjekëve, specialistë të traumave dhe neurolog, është dalë në përfundimin që ky rast të dërgohet urgjent në Spitalin Ushtarak të Traumës në Tiranë.

“Ora shënon 23:30 – shpjegon kryekzekutivja e Skënderbeut – kur nisemi me autoambulancë për të dërguar basketbollistin drejt Tiranës. Në këtë moment kam qenë e dyzuar të kërkoj, apo jo, mbështetjen e zëvendëskryeministrit Peleshi. Dhe dyshimi ishte jo për rastin, që në fakt duhej patjetër, por për kohën, sepse ishte mesnatë. Gjithsesi vendosa të kërkoj mbështetjen e tij.

E kështu veprova, dërgova një mesazh në celularin e tij, në të cilin e lajmëroj për rastin. Ishte gati e pabesueshme që në atë orë të natës la të gjitha preokupimet familjare dhe në mënyrë totale ka qenë me ne. Na ka ndjekur hap pas hapi, të gjitha hallkat, që nga rrugëtimi drejt Tiranës, arritja në spital, diagnostikimi i detajuar, e deri te përgjigja e mjekëve, që për fatin tonë të mirë doli pozitive”. Dhe në këtë moment, gatishmëria e Peleshit, qytetaria e tij për të mos harruar ata të cilët e kanë votuar, apo me të cilët ka kaluar një jetë të gjatë në Korçë, e ka bërë Marash që të thotë me zë të lartë: Falëminderi Niko Peleshi.

“E falënderoj publikisht, me zë të lartë, zëvendëskryeministrin tonë, që për fat të mirë është një nga djemtë me të cilin qyteti ynë krenohet. Dua t’i drejtohem si nënë, si drejtues sporti, si qytetare dhe t’i them Faleminderit Niko dhe ky vend ka nevojë për njerëz si ti. Të jam mirënjohës dhe ky falënderim më del thellë nga zemra”, ka përfunduar shefja e klubit shumësportësh Skënderbeu, Tatjana Marash, kurse dhe dëmtimi i basketbollistit Edgar Shehi duket se ka kaluar.