Nga Gjergj Vyshka

Superkupa e basketbollit kthehet në festë, por dhe në debate për gjykimin e finaleve

Për vlonjatet e Viron Toskës është kërkuar koha shtesë, Karaj merr përsëri kamzalinjtë

Flamurtari – Apolonia 87-83
(17-13, 23-19, 15-20, 19-22/13-9)
Flamurtari: K.Hasanaj (3), Kostallari (12), Plasa (29), Qypi (14), Zykaj (27)/Myrto, Palko (2) Trajner: V.Toska
Apolonia: Aliaj (8), Dishnica (7), Mehmeti (11), Semanjaku (19), Xhanaj (22)/Demiraj (8), Memçaj, Ustalli, Perqyku (8) Trajner: A.Greva
Gjyqtarë: E.Koçi, G.Hoxha, E.Allaraj (Tiranë)
Vllaznia – Kamza Basket 58-67
(12-13, 16-7, 14-23, 16-24)
Vllaznia: Arra (4), Bërdica (22), Ndoja (10), Bekteshi (10), Shaqiri (3)/Faslija (2), Llazani (5), Rakaj, Taraboshi, Huti (2) Trajner: B.Gjeçaj
Kamza Basket: Shestani (14), Ndreko (6), Muhametaj (4), Karaj (26), Daliu (10)/Birçaj (2), Gjoka (5), Hoxha Trajner: A.Muhametaj
Gjyqtarë: G.Cici, E.Koçi (Tiranë), E.Hoxhaj (Vlorë)
Flamurtari dhe Kamza Basket janë fituesit e Superkupës së Shqipërisë në basketboll për meshkuj dhe femra, ndërsa finalet e luajtura dje në mbrëmje në sallën kryesore të Pallatit të Sportit “Asllan Rusi” jo vetëm që kanë qenë të forta dhe më pas të kthyer në festë për skuadrat fituese, por kanë ndezur debatet nga humbësit ndaj gjykimit të ndeshjeve. Ndonëse për finalet ishin zgjedhur gjyqtarët më të mirë të basketbollit shqiptar, si dhe ato që janë ndërkombëtar. Në finalen e femrave është dashur koha shtesë, kurse tek meshkujt ka spikatur Erkand Karaj, i cili me trepikëshat e tij është bërë vendimtar për Kamza Basket, që kështu e ka fituar për herë të tretë radhazi Superkupën e Shqipërisë.

Nuk kanë munguar në këto finale jo vetëm figurat më të ndritura të basketbollit shqiptar të tilla si Viktor Papavangjeli, Vaso Shaka, Spiro Kuvarati, por dhe krerët e koshit shqiptar. E kjo që nga presidenti i Federatës Shqiptare të Basketbollit, Avni Ponari, sekretari i përgjithshëm Korab Llazani, si dhe anëtari i kryesisë së koshit shqiptar, Bashkim Milo. Jo vetëm kaq, por kanë qenë të pranishëm Kryetari i Bashkisë së Fierit, Baftjar Zeqo, dhe ai i Kamzës, Xhelal Mziu. Si dhe kryetari i Kontrollit të Lartë të shtetit, Bujar Leskaj. Pra dy finale Superkupe që kanë mbledhur kaq shumë VIP-a, tifozë, gazetarë e kamera.
Flamurtari e ka një emër, Elektra Zykaj
Nëse Flamurtari dje ka qenë fituese e Superkupës së Shqipërisë dhe kjo për të njëmbëdhjetën herë ka pasur një emër, Elektra Zykaj. Lojtarja e ardhur nga Tirana, pa harruar lojën e mirë të Plasës, apo dhe Qypit e Kostallarit, është bërë vendimtare me trepikëshat e saj. Flamurtari e ka nisur mirë ndeshjen, teksa ka fituar dy periodat e parë dhe me një avantazh prej 8 pikësh diferencë ka shkuar në dhomat e zhveshjes me fitoren, 40-32. Por fillimi i periodës së tretë është marramendës për kampionet në fuqi. Mehmeti dhe Semanjaku, apo dhe Demiraj përmbysin gjithçka me trepikëshat e tyre. Me një avantazh të pjesshëm 2-18, Apolonia është në avantazh 42-50.

Por Flamurtari nuk dorëzohet dhe ka arritur që në fund të periodës së tretë, pavarësisht se fieraket kanë fituar 15-20, të jetë përsëri në avantazh 55-52. E katërta është një luftë nervash. Xhanaj është e fuqishme në depërtimet e saj, por në krahun tjetër dhe vlonjatet nuk dorëzohen. Aq sa fundi i ndeshjes i ka ndarë në barazim 74-74. Kostallari me një krah dhe Aliaj në krahun tjetër e kanë lënë ndeshjen më shpejt se të tjerat, sepse kanë plotësuar numrin pesë të gabimeve personale. Në kohën shtesë, edhe me petkun e kampionit, Flamurtari nuk fal më. Dhe në fund fiton 87-83 duke bërë të veten Superkupën e Shqipërisë.

The post Trofe për Flamurtarin e Kamza Basket appeared first on Sporti Shqiptar Online.

Nga Gjergj Vyshka

Java e katërt e futbollit të sallës ka regjistruar tre fitore të skuadrave udhëtuese

Black Sheep nuk ka të paguajë sallën, gati të tërhiqet nga kampionati i sivjetmë

Universiteti Epoka – Edro Vlora 6-10
Universiteti Epoka: Llukaj, Zenelaj, Gashi, Gjyrezi, Rada/Tufa, Omeri, Dautovi, Bazelli, Hoxha Trajner: I.Gashi
Edro Vlora: Rrapaj, Golemi, Tajaja, Shakaj, Resuli/Mihali, Ormenaj, Baka, Agalliu Trajner: A.Golemi
Gjyqtarë: K.Hakrama, A.Bixhi (Tiranë)
Kartonë të verdhë: Zenelaj/Mihali (2)
Karton i kuq: Mihali
Shënues: Dautovi 12’, 14’, 38’, Gjyrezi 36’, Bazelli 51’, Tufa 60’/Shakaj 1’, 6’, 35’, Resuli 2’, 15’, 52’, Agalliu 16’, 48’, Tajaja 26’, Baka 42’
Java e katërt e kampionatit të dymbëdhjetë kombëtar të futbollit të sallës nuk është zhvilluar e plotë. Ishte paralajmëruar që më parë nga administratori i Pallatit të Sportit “Asllan Rusi”, Ardian Yzeiraj, se Black Sheep nuk do të lejohej të luante, pasi nuk ka paguar sallën për dy ndeshjet e saj. Mirëpo nisur dhe nga fakti se do të luante me Tiranën thuajse në orarin stërvitor që bardheblutë e Artur Angonit bëjnë në Pallatin e Sportit “Asllan Rusi” mund të mendohej dhe një gjetje e gjuhës së përbashkët mes të dy skuadrave.

Por nuk ka ndodhur kështu. Federata Shqiptare e Futbollit, ndryshe nga tre ndeshjet e tjera të luajtura dje, nuk kishte vendosur për Black Sheep – Tirana as gjyqtarët dhe as delegatin. E për rrjedhojë ndeshja nuk është luajtur, ndërsa Black Sheep, të paktën edhe sipas përgjegjësit të futbollit të sallës në Federatën Shqiptare të Futbollit, Endi Hyka, duket se ka të ngjarë të tërhiqet nga kampionati për arsye financiare. Dhe kjo nuk i bën fort mirë garës, kur ende janë për t’u luajtur dhe tre javë të tjera deri në përfundim të fazës së parë.
Ndeshjet e tjera të së katërtës
Java e katërt e futbollit të sallës ka regjistruar vetëm fitoret e skuadrave udhëtuese. Gjithçka e ka nisur dje pasdite KS Ali Demi, që ka fituar në Vlorë me Flamurtarin, 5-3. E ka vazhduar Vllaznia, e cila ka shënuar dymbëdhjetë gola në portën durrsake duke regjistruar dhe fitoren më të thellë të javës ndaj Teutës vendëse. Dhe fitoren e tretë si skuadër udhëtuese e ka marrë Edro Vlora ndaj Universitetit Epoka. Vlonjatët e Artan Golemit e kanë nisur shpejt ndeshjen, ndërsa në harkun kohor të gjashtë minutave kanë shënuar tre herë me anë të Shakajt dhe Resulit. Epoka nuk dorëzohet, por nëpërmjet dopietës së Dautovit arrin të ngushtojë në 2-3.

Mirëpo vlonjatët, edhe për shkak të eksperiencës që kanë krijuar në kampionatet e futbollit të sallës, teksa kanë dalë dhe kampion, kanë ditur shpejt të dalin nga situata. Dhe në fund të pjesës së parë shifrat e rezultatin janë 6-2 për Edron. Thellon Shakaj, por ngushton Gjyrezi e Dautovi në 4-7. Edhe një vrull tjetër i vlonjateve për të siguruar fitoren e ndeshjes, ndërsa me Bakan e Agalliun thellohet në 4-9. Në përfundim 6-10 për Edron. Por ajo që duhet pranuar është se ka pasur dhe nerva, të cilat Hakrama nuk i ka falur. Fillimisht ka ndëshkuar për protestë Zenelajn e Universitetit Epoka, që kaloi dhe rrethimin e brendshëm të fushës dhe që nga andej nisi debatin me gjyqtarin.

E më pas dhe Mihalin e Edro Vlorës, këtë të fundit me karton të kuq. Mihali ka pasur një debat me portierin e Universitetit Epoka, Llukaj, ndaj dhe Hakrama i ka dhënë karton të verdhë. Por Mihali ka thënë diçka nëpër dhëmbë, aq sa ka mjaftuar që të vijë për të e verdha e dytë dhe automatikisht e kuqe. Megjithatë Edro ka fituar dhe duke përfituar, kjo së bashku me KS Ali Demin që është kryesuese, nga humbja e Flamurtarit dhe pushimi i Tiranës, është në vendin e dytë në renditje. Kjo ka qenë java e katërt e futbollit të sallës.

The post KS Ali Demi gjen kreun, Edro fiton dhe ndjek appeared first on Sporti Shqiptar Online.

Nga Gjergj Vyshka

Në konkurrim do të jenë dhe Arben Cerina dhe Lumturi Pepa e sërisht Kuçana

Presidenti Rrufa: Të jeni të sigurt se qitja do të jetë e kualifikuar me normë në “Rio 2016”

Qitja është disiplina e parë sportive në vend, e cila sjell medalje nga aktiviteti ndërkombëtar për vitin 2015. Gjithçka ka ndodhur dje në Çmimin e Madh të Kuvajtit, atje ku Arben Kuçana në qitje me pistoletë 50 metra ka zënë vendin e tretë duke marrë njëkohësisht dhe medaljen e bronztë. Lajmi ka ardhur nga presidenti Stefan Rrufa, i cili së bashku me sekretarin e përgjithshëm Koço Mikerezi janë në krye të delegacioni shqiptar, që ka mbërritur atje me ftesë të Federatës së Qitjes së Kuvajtit. Ky është aktiviteti i katër ndërkombëtar që bëhet nën emër të mbretit të Kuvajtit, i cilësuar si Çmimi i Madh ndërkombëtar.

Një aktivitet që është njohur dhe nga Federata Botërore e Qitjes, ndërsa në të marrin pjesë qitës të niveleve të larta botërore, fitues medaljesh në aktivitetet ndërkombëtare deri në Lojërat Olimpike. Kuçana pasi ka bërë një garë të mirë në gjysmëfinale, atje ku me 543 pikë ka zënë vendin e tetë ka qenë i papërmbajtshëm në finale, ndërsa ka zënë vendin e tretë, duke merituar kështu dhe medaljen e bronztë. Para tij, por me pikë të vogla, janë renditur qitësi serb Mikec Damir, që ka marrë medaljen e argjendtë, si dhe në vendin e parë qitësi nga Kazakistani, Isashenko.

Ndërkohë gjithnjë sipas presidentit Rufa në këtë garë do të marrin pjesë dhe Arben Cerina dhe Lumturi Pepa, si dhe do të bëjë garë të dytë dhe Arben Kuçana duke shpresuar kështu që të jetë përsëri me medalje në këtë aktivitet. Presidenti Rufa shprehet i sigurt se qitja do të jetë e kualifikuar për në Lojërat Olimpike “Rio de Zhaneiro 2016”. “Ne kemi planifikuar një sërë garash ndërkombëtare, të cilat janë të vlefshme për t’u kualifikuar për në Rio de Zhaneiro, ndërsa kjo medalje e Kuçanës na bën optimistë për arritje e kualifikimit me normë për 2016-ën”, ka theksuar Rufa.

The post Arben Kuçana, bronz në Çmimin e Madh të Kuvajtit appeared first on Sporti Shqiptar Online.

Sekretari i përgjithshëm i Federatës Shqiptare të Volejbollit, Leonard Tase, teksa ka përfunduar tashmë faza e parë e kampionatit të të rinjve dhe të rejave, ka bërë një statistikë të garës nëpërmjet renditjes. Për meshkuj dhe për femra, ashtu sikurse është bërë e ditur më parë, Studenti dhe Barleti Volej kanë qenë kampion dimri. Ndërkohë tek moshat, atje ku janë në garë 22 ekipe, 6 për djem dhe 16 për vajza, kryesojnë Elbasani, Tirana dhe Himara. Nuk duhet harruar që sezonin e kaluar, Elbasani ka qenë nënkampion i Shqipërisë në volejboll për të rinj, kurse Himara për të reja. Dhe fituesit në fuqi të kampionatit të moshave janë Tirana Volej për djem, e cila këtë javë do të jetë pjesëmarrëse në Kupën e Shqipërisë, si dhe Tirana për të reja. Një garë përmes statistikave është dhe një informacion më shumë për sportdashësit dhe trajnerët, të cilët tashmë e kanë të qartë pozicionin e ekipit të tyre në përfundim të fazës së parë.

The post Volejbolli shqiptar përmes statistikave appeared first on Sporti Shqiptar Online.

Qitja shqiptare është ndër ato sporte në vend që pas peshëngritjes gjithnjë na ka përfaqësuar në Lojërat Olimpike. Kështu ka ndodhur më 1972-in në Mynih, atje ku kanë marrë pjesë Beqir Kosova, Ismail Rama, Fatos Pilikati dhe Afërdita Tusha. Më pas më 1992 në Barcelonë, që është Olimpiada e cila rikthen Shqipërinë pas mbylljes nga regjimi komunist, kanë qenë Kristo Robo dhe Enkelejda Shehu. Në Atlanta 1996 është përfaqësuar nga Diana Mata dhe Enkelejda Shehu. E më pas në Sidnei në 2000-in nga Diana Mata.

Ndërkohë më 2008-ën në Pekin Shqipëria ka qenë me normë, e cila ka ardhur nga nënkampionia e Evropës në Granada 2007, Lindita Kodra, e cila pat zënë dhe vendin e katërt në Kupën e Botës në Kinë më 2008-ën. Kurse më 2012-ën në Londër Shqipëria e qitjes është përfaqësuar nga Arben Kuçana, që dje ka qenë medalje e bronztë në Kuvajt. Si një ogur i mirë jo vetëm për qitjen, por dhe për të gjithë sportin shqiptar. Sepse kështu sporti është ende në këmbë, larg problemeve të dopingut që pushtuan peshëngritjen, apo dhe larg trukimeve që po mbysin futbollin shqiptar. Shkurt, Arben Kuçana dhe medalja e tij e bronztë është arritje për qitjen në veçanti dhe sportin në përgjithësi.

The post Qitja shqiptare në Olimpiada appeared first on Sporti Shqiptar Online.

Nga Gjergj Vyshka

Federata Shqiptare e Bilardos ka lajmëruar se të shtunën në Qendrën Sportive të saj, e cila ndodhet në Rrugën e Dibrës në Tiranë, do të zhvillohet turneu mbarëkombëtar në disiplinën me nëntë gurë në lojën çifte. Në të do të marrin pjesë Roland Xoxi-Marjus Zyla, Dorjan Maknori-Eklent Kaçi, Denio Gjinali-Denis Zaçe, Edlir Kurthysa-Eduard Zeqiri, Xhimi Belba-Kushtrim Prenga, Fogert Kallepi-Zamir Hodaj, Eduard Bregu-Xhuljo Marku, Ervis Kamani-Marjan Nikolli. Dhe sipas drejtuesve të Federatës Shqiptare të Bilardos, të paktën deri më 28 janar, pritet të regjistrohen dhe gjashtë çifte nga Kosova dhe Maqedonia si pjesëmarrëse

The post Mbarëkombëtari i bilardos, gati stekat appeared first on Sporti Shqiptar Online.

zhanio

Nga Gjergj Vyshka

Komiteti Olimpik i kontinentit tonë ka konfirmuar ftesën e bërë nga KOKSH për takimin

Presidenti Bezhani: Ky është promovim për sportin shqiptar dhe mbështetje për projektet

Komiteti Ekzekutiv i Komitetit Olimpik të Evropës një ndër mbledhjet e radhës për vitin 2015 do ta zhvillojë në Tiranë në muajin shtator. Ky është lajmi që Komiteti Olimpik Kombëtar Shqiptar ka shpërndarë, ndërsa është një nga pikat e marrëveshjes së arritur në nëntorin e 2013-ës pas zgjedhjeve të reja të Komitetit Olimpik të Evropës që u zhvilluan në Romë. Në fakt kanë qenë të premtuar disa dhe deri më tani janë realizuar arritja e marrëveshjes për të realizuar stërvitjen jashtë vendit në ditët e para të vitit 2014 për Luiza Gegën, seminari i organizuar me temën “Forcimi i qeverisjes së mirë” më 27 janar dhe tanimë një nga mbledhjet e Komitetit Ekzekutiv të Komitetit Olimpik Evropian në shtator në Tiranë.

Duke mbetur këtu, njoftimi ka ardhur nga sekretari i përgjithshëm i Komitetit Olimpik Evropian, Rafaela Panjoci, i cili ka komunikuar nëpërmjet e-mailit me sekretarin e përgjithshëm të Komitetit Olimpik Shqiptar, Stavri Bello, të cilit i ka konfirmuar zhvillimin e kësaj mbledhjeje më 17 shtator në Tiranë. Në tekstin e letrës që ka mbërritur nga Komiteti Olimpik Evropian shkruhet: “Duke ju uruar nëpërmjet e-mailit për një vit të mbarë, ju bëjmë me dije se e kemi pranuar ftesën e Komitetit Olimpik Shqiptar për zhvillimin e takimit të tretë të Komitetit Ekzekutiv në Tiranë.

Me konfirmimin e presidentit të Komitetit Olimpik Evropian ju njoftojmë se kjo mbledhje do të bëhet më 17 shtator. Sekretariati i Komitetit Olimpik Evropian do të jetë në kontakt të vazhdueshëm me ju, e cila do të përgjigjet për organizimin e këtij takimi në shtator 2015”. Në fakt Komiteti Olimpik Evropian e ka në agjendën e vet që mbledhjet e Komitetit Ekzekutiv i bën në vende të ndryshme. Kështu për vitin 2015, takimi i dytë i këtij Komiteti do të bëhet më 14 maj në Antalia, i treti më 17 shtator në Tiranë dhe i katërti më 19 nëntor në Pragë. Madje do të jetë në prag të asamblesë së Komitetit Olimpik Evropian, që do të zhvillohet po në Pragë, më 20-21 nëntor. Një përgjegjësi e madhe për Komitetin Olimpik Shqiptar, sepse është ndër rastet e rralla që ndodh që Komiteti Ekzekutiv të bëjë mbledhje në Tiranë.

Sepse ardhja e personaliteteve më të larta të sportit evropian në vendin tonë është vlerë e shtuar për sportin tonë. Këtë ka dashur të deklarojë dhe presidenti i Komitetit Olimpik Shqiptar, Viron Bezhani, që për Gazetën e Sportit do të deklaronte: “Përgjigja pozitive e presidentit të Komitetit Olimpik Evropian për të sjellë mbledhjen e radhës të Komitetit Ekzekutiv në Tiranë është tregues i bashkëpunimit të mirë ndërmjet organizatave dhe veçanërisht do të jetë pozitive për të ardhmen e sportit në vendin tonë. Kjo do të thotë në zhvillimin e projekteve për promovimin e sportit shqiptar në arenën ndërkombëtare, si dhe mbështetje për të gjitha projektet që ne kemi për zhvillimin e tij. Edhe një herë kjo mbledhje e Komitetit Ekzekutiv të Komitetit Olimpik të Evropës në Tiranë është një vlerë e shtuar për sportin shqiptar”, ka përfunduar presidenti i Komitetit Olimpik Kombëtar Shqiptar, Viron Bezhani.

The post Komiteti Ekzekutiv i Evropës në shtator në Tiranë…! appeared first on Sporti Shqiptar Online.

 Nga Gjergj Vyshka

Kampionët e basketbollit shqiptar janë mundur me 40 pikë diferencë nga Kozuvi

Pjesëmarrje zhgënjyese e shkodrane, ndërsa përfundimi dihej pa nisur ende gara

Kozuv – Vllaznia 99-59
(24-14, 35-20, 25-7, 15-18)
Kozuvi: Nesoviç (13), Albijaniç (8), Glavshev (7), Pekoviç (8), Brshkov (8)/Apostolov (4), Bogojev (12), Sepa (7), Janjuseviç (15), Bozoviç (4), Ivelja (9), Goçevski (4) Trajner: M.Pejiç
Vllaznia: Bekteshi (15), Berdica (17), Ndoja (6), Fasllija (5), Huti (11)/Shaqiri, Llazani, Taraboshi (5) Trajner: B.Gjeçaj
Gjyqtarë: V.Tsekov, I.Manolov (Bullgari), G.Pursanidis (Greqi)
Vllaznia e ka pasur fundin me turp në Ligën Ballkanike. Një pjesëmarrje zhgënjyese e shkodranëve të Bledar Gjeçajt, jo vetëm në ndeshjen e djeshme në Gevgelija të Maqedonisë përballë Kozuvit, por në përgjithësi në të gjithë pjesëmarrjen e saj në Ligën Ballkanike. 7 ndeshje dhe 7 humbje, që nuk bëjnë asgjë tjetër, por vetëm vërtetojnë se basketbolli shqiptar e ka ende të pamundur për t’u përballur në nivelin ndërkombëtar. Përtej përpjekjeve të presidentit të Federatës Shqiptare të Basketbollit, Avni Ponari, për të nxitur pjesëmarrjen e ekipeve shqiptare në Ligën Ballkanike jo më me një, por me dy, produkti që zbret në parket është një hiç. Me gjithë dëshirën e mirë, sidomos kur skuadrat shqiptare janë pa lojtarë të huaj – edhe kur kanë pasur janë nga ata basketbollistë të cilët janë shtrydhur nëpër vendet e veta dhe kanë përfunduar gjithçka atje e mandej nuk bëjnë asnjë diferencë me tanët – nuk mund të bëjnë asgjë më shumë. Kjo ishte e gjithë pjesëmarrja e Vllaznisë në Ligën Ballkanike të basketbollit për meshkuj, e cila u vulos me humbjen e thellë ndaj maqedonasve të Kozuvit dje në mbrëmje, jo pak, por 40 pikë.
Ndeshja – Vendësit e kanë nisur shpejt ndeshjen, teksa kanë kryesuar deri në 4-0. Mandej një trepikësh i Hutit ngushton rezultatin në 4-3. Dhe një hyxhym tjetër i maqedonasve, të cilët shkëputen deri në 8-3. Mirëpo Fasllija sërish godet me trepikësh dhe 8-6. Madje Vllaznia nëpërmjet Ndojës arrin të barazojë në 8-8 dhe në të vetmin moment që ka dalë në avantazh është në periodën e parë, atëherë kur me Ndojën dhe Fasllinë shkëputet në 10-11. Mirëpo këtu përfundon orvatja e Vllaznisë për të rivalizuar. Me një rezultat të pjesshëm 14-4, Kozuvi e ka fituar periodën e parë 24-14. E dyta është e baraspeshuar deri në 28-22. Kozuvi merr vrull dhe me një tjetër avantazh të pjesshëm 14-0 është shkëputur deri në 20 pikë diferencë, 42-22. Kozuvi nuk ndalet, por në një tjetër moment të periodës së dytë i ka futur dhe një tjetër presing dhe avantazh të pjesshëm 9-0 dhe 58-31.

Në fund të periodës së dytë, kur Kozuvi kishte 35-20, rezultati ishte 59-34. E treta është marramendëse për shkodranët, të cilët nuk arrijnë të bëjnë asgjë përballë vrullit të Kozuvit të përbërë nga serb e bullgarë e shumë pak maqedonas. Nga 62-36 në 75-36, kurse brenda një harku kohor prej gjashtë minutash, Kozuvi ka kryesuar 13-0. Vllaznia është munduar të shënojë ndonjë pikë. Por kur perioda e tretë ka përfunduar 25-7 dhe Kozuvi ka kryesuar në 84-41 gjithçka është e përfunduar. Mundohet Vllaznia ngushtojë në të katërtën, teksa e ka fituar këtë periodë 15-18. Veçse një humbje me 40 pikë diferencë, e cila është në të njëjtin nivel si në Kravojë, thuajse në të njëjtin nivel si humbja në Shkodër me Kozuvin. Por në të njëjtin nivel me të gjitha ndeshjet që u luajtën, të cilat nuk bën asgjë, por sollën një përfaqësim turpërues dhe zhgënjyes në veçanti për Vllazninë e në tërësi për të gjithë basketbollin shqiptar. Sepse kjo ishte pasqyra më e mirë e asaj që gatuhet në kampionatin kombëtar.

The post Vllaznia fund me turp Ligës Ballkanike appeared first on Sporti Shqiptar Online.

Nga Gjergj Vyshka

Komiteti Olimpik Kombëtar Shqiptar ka vendosur që të rrisë bashkëpunimin me Iranin. Gjithçka ka ardhur si fryt i takimit të presidentit të Komitetit Olimpik Kombëtar Shqiptar, Viron Bezhani, dhe sekretarit të përgjithshëm të institucionit më të lartë të olimpizmit shqiptar, Stavri Bello, me ambasadorin e Republikës Islamike të Iranit në Tiranë, A.Majid Mozafari. Madje vizita që është zhvilluar dje në ambientet e Komitetit Olimpik Kombëtar Shqiptar ka qenë me kërkesë të ambasadorit të Iranit në Tiranë. Sipas njoftimit të Komitetit Olimpik Kombëtar Shqiptar, biseda e Bezhanit dhe Bellos me ambasadorin Mozafari është përqendruar në idenë e rritjes së bashkëpunimit dhe zhvillimit të mëtejshëm të marrëdhënieve mes dy Komiteteve Olimpike.

Që do të thotë se gjithçka duhet të bëhet mbi bazën e një protokolli marrëveshjeje bashkëpunimi ndërmjet Komiteteve Olimpike të Shqipërisë dhe Iranit, i cili do të synojë në shkëmbimin e eksperiencave pozitive në fushën e sportit elitar, në kualifikimin e trajnerëve, në trajnimet e përbashkëta të sportit elitar dhe në mundësinë e organizimit të një kampingu sportiv nga pala iraniane për stërvitjen e ekipeve të të dy vendeve.

Takimi, gjithnjë sipas njoftimit të KOKSH, është zhvilluar në frymën e miqësisë dhe bashkëpunimit, ndërsa u theksua roli i rëndësishëm që sporti luan në forcimin e bashkëpunimit ndërmjet dy vendeve. “Sporti është gjuha që i bashkon popujt, prandaj dhe ne do të synojmë të punojmë në këtë drejtim”, kanë thënë Bezhani, Bello e ambasadori i Iranit në Tiranë, Mozafari. Nuk duhet harruar që të paktën në volejboll dhe mundje Irani është ndër vende elitare të sportit në botë. E më pas dhe në peshëngritje, boks e disiplinat e tjera sportive. Ndaj sporti shqiptar ka se çfarë të përfitojë nga bashkëpunimi me Iranin, qoftë dhe financiarisht.

The post KOKSH rrit bashkëpunimin me Iranin appeared first on Sporti Shqiptar Online.

Nga Tonin Frroku

“Akoma vetëm një fëmijë, Zheku është kampionë absolute në 100 metra shpinë”, shprehet gazeta më e madhe në Boston, që vlerëson korçaren e notit.
Në fundin e muajit gusht të vitit të kaluar Gazeta e Sportit ka publikuar lajmin që vinte nga Bostoni. Notarja korçare, Filipa Zheku, absolutisht ka qenë zbulimi i vitit të kaluar si një sportiste më shumë se cilësore. Një vit më parë ka qenë 16 vjeç, ndërkohë që në këto momente akoma nuk ka mbushur 17 vjeç dhe vijon të rritet nga dita në ditë me rezultatet e saj të larta. Verën e kaluar Zheku mbërriti në Korçë sepse është shqiptare dhe deklaroi që dëshiron që të konkurojë në eventet më të mëdha evropiane dhe botërore me flamurin kuqezi.

Verën e këtij viti pritet që Zheku të marrë pjesë në të gjitha disiplinat e notit në Shqipëri, ndërkohë që rezultatet e saj krahasuar me notaret shqiptare janë shumë të larta. Madje për moshën që ka mund të quhet absolutisht një kampione e padiskutueshme. Një “yll” në not i është shtuar Shqipërisë dhe sigurisht që Federata e Notit e ka pranuar me dëshirën më të madhe që një notare e këtij niveli të konkurojë për ngjyrat kuqezi.
Boston – Vlerësimi kaq i madh që i është bërë kësaj notareje shqiptare është konkretizuar edhe në anketën 10 sportistët më të mirë që organizohet çdo vit në Boston. Dhe për gjithë vitin 2014-të, notarja korcare Filipa Zheku, është shpallur fituese në 10 sportistët më të mirë. Një krenari e madhe për Shqipërinë, aq më tepër që nuk është rastësi apo diçka e zakontë që të shpallesh në 10 sportistët më të mirë në një shtet në Shtetet e Bashkuara të Amerikës. Në 10 sportistët më të mirë ka pasur dy futbollistë të këtij shteti, Josep Tejlër dhe Majkëll Grasej. Në golf është shpallur Xho Santulo, ndërkohë që në volejboll Viktoria Hain dhe kështu me radhë 10 sportistët më të mirë në Boston. Në not, Zheku ka qenë e vetmja që ka hyrë në 10 sportistët më të mirë në Boston.
Vlerësimi – Ja çfarë thuhet më konkretisht për notaren shqiptare: “Akoma vetëm një fëmijë, akoma pa mbushur 17 vjeç, Zheku është një kampione e padiskutueshme në 100 metra stil shpinë. Duke bërë një sezon të shkëlqyer, ajo ka habitur të gjithë edhe në stilin flutur. Përveç fitimit të ligës ajo është pozicionuar në vendin e gjashtë në 200 metra stil individual dhe miks. Ndër të tjerat, e veçanta për Zhekun është edhe thyerja e rekordit të shkollës në 500 metra stil të lirë me një kohë 35”53 dhe stil shpine me kohën 59”95. Ajo gjithashtu mban rekordin për 200 metra stil flutur. Zheku është një notare me qëndrim të mirë dhe absolutisht me të dhëna të mëdha”. Jo vetëm kaq, por ajo është kthyer në një motivuese për notaret e tjera. Kjo notare është çdo vit pjesëtare e skuadrës elitë të Krimson dhe është zgjedhur edhe kapitenia për vitin 2015.

The post 17-vjeçarja Zheku në dhjetë sportistët më të mirë në Boston appeared first on Sporti Shqiptar Online.

Nga Gjergj Vyshka

Kampionet dhe fitueset në fuqi të trofeut të dytë më të rëndësishëm kalojnë lehtë Partizanin

Bardheblutë heqin “të zinjtë e ullirit” me durrsaket e Jazenxhiut, ndeshja zgjidhet me set të pestë

Barleti Volej – Partizani 3-0
(25-23, 25-17, 25-21)
Barleti Volej: Bici, Nezaj, A.Gjermeni, Braho, E.Tuci, Harxhi, Fagu (L)/J.Gjermeni Trajner: H.Gurabardhi
Partizani: M.Tuci, Xhixha, Reka, Xheka, Shehu, Shaba, Zeqirllari (L) Trajner: R.Tarja
Gjyqtarë: A.Telo, E.Preka (Tiranë)
Asistentë: E.Papamihali, E.Dusha (Tiranë)

Tirana – Teuta 3-2
(21-25, 25-16, 22-25, 25-20, 15-13)
Tirana: Matoshi, Vokrri, Pira, Meta(L), Thaka, Prenga, Vujadinoviç/Blloku, Hoxha Trajner: A.Gorenxa
Teuta: Begiçi, Smajlaj, Gashi, Zakova, Guza, Borshi, Llupo (L) Trajner: E.Jazenxhiu
Gjyqtarë: E.Mujo, T.Zguri (Tiranë)
Asistentë: R.Mujo, E.Kurti (Tiranë)
Barleti Volej – Tirana është finalja e Kupës së Shqipërisë në volejboll për femra, ndërsa është një duel që përsëritet për herën e tretë radhazi. Një herë kanë fituar bardheblutë e Gorenxës dhe një herë vajzat e Gurabardhit. Kurse tarafleksi i volejbollit shtruar në sallën kryesore të Pallatit të Sportit “Asllan Rusi” duket se do të nxjerrë një finale interesante, ndonëse gjysmëfinalet e djeshme kanë qenë të lodhshme për të dyja finalistet. Veçanërisht për Tiranën, e cila ka hequr të “zinjtë e ullirit me Teutën, teksa ndeshja është zgjidhur në setin e pestë, quajtur ndryshe seti final. E megjithatë të dyja gjysmëfinalet kanë tërhequr vëmendjen e shikuesve, sikurse ka ndodhur dhe me televizionet.
Barleti Volej një lojë me hope
Barleti Volej edhe pse ka fituar 3-0 me Partizanin ka bërë një lojë me hope. Nëse skuadra e Gurabardhit ka qenë fituese dje kjo është për meritë veçanërisht të Brahos e Nezajt. Pa thënë deri diku të Bicit, e cila në momente të caktuar ka qenë larg asaj çka presin të gjithë. Në setin e parë Partizani ka rezistuar të paktën deri në 14-15. Më pas nis shkëputja e Barletit, e cila me shumë vështirësi arrin ta marrë setin e parë 25-23. Në të dytin ka vetëm një ekip në fushë, që është ai i Gurabardhit, që e ka fituar setin e dytë 25-17. E njëjta histori si në setin e parë, sepse Partizani reziston në tentativën e vet për të kthyer ndeshjen. Ka kryesuar të paktën deri në 9-12. Dhe në 18-17 për Barletin Volej duket sikur është kthyer në ndeshja. Por Partizani barazon në 20-20.

E më pas fiton Barleti Volej 25-21 dhe të gjithë ndeshjen 3-0. Për protesta ndaj gjyqtarëve janë ndëshkuar me kartonë të verdhë trajnerët Gurabardhi dhe Tarja. Pikëshënuesja më e mirë e ndeshjes ka qenë Nezaj me 13 pikë, e ndjekur nga Braho me 12 pikë dhe Bici me 10 pikë. Në bllok ka dalë fitues Nezaj dhe Xhixha me tre mure fituese, kurse në shërbim Xheka me tre të sakta. Në total Barleti Volej ka shënuar 75 pikë, prej të cilave 61 pikë i ka shënuar vetë, kurse 14 pikë kanë ardhur nga gabimet e Partizanit. Në krahun tjetër Partizani në tre sete ka shënuar 61 pikë, prej të cilave 50 pikë vetë, kurse 11 pikë kanë ardhur nga gabimet e Barletit Volej.
Tirana, çfarë sikleti me Teutën
Është menduar jo vetëm një sfidë e lehtë, por dhe e shpejtë. Mirëpo nuk ka ndodhur kështu, sepse Teuta, me vetëm shtatë lojtare, ka bërë rezistencë e deri në fund ka qenë shumë pranë fitores dhe surprizës. Bardheblutë kanë aktivizuar malazeze Vujadinoviç, e cila ndoshta edhe për shkak të mos aktivizimit nga organizatorja, me vështirësi ka hyrë në lojë. Por gjithsesi sa herë që godiste, aq herë shënonte. Nuk duhet harruar që bardheblutë kanë fituar dje dhe në sajë të Prengës dhe përvojës së saj të madhe, ndërsa nuk ka qenë në ditën e saj më të mirë Thaka. Në setin e parë, Tirana është në avantazh deri në 15-12. Por Teuta nuk dorëzohet. Kthen rezultatin në 17-19 dhe mandej është fituese e setit të parë në 21-25. Në të dytin Tirana fiton lehtësisht 25-16.

I treti edhe me ndërrimin e fushave i jep më shumë kurajë Teutës, që përsëri fiton 22-25. Për të pasur surpriza të pakëndëshme bardheblutë jo vetëm që janë gjithnjë në udhëheqje të rezultatit, por e fitojnë setin e katërt 25-22 dhe 2-2. I pesti ka nisur mirë për Tiranën, që në ndërrimin e fushave është në avantazh 8-1. Por Teuta gradualisht afrohet derisa barazon në 13-13. Ka pasur dhe debate të trajnerëve me gjyqtarët, ndërsa Jazenxhiu është ndëshkuar me karton të verdhë në avantazhin 10-7 për bardheblutë. Pas barazimit Tirana s’bën më aventura, por fiton 15-13 dhe të gjithë ndeshjen 3-2.

Pikëshënuesja më e mirë e ndeshjes Vujadinoviç e Tiranës me 17 pikë, e ndjekur nga Smajlaj e Teutës me 16 pikë. Në bllok kanë dalë fituese me nga gjashtë mure rezultative Pira e Tiranës dhe Borshi e Teutës. Kurse në shërbim ka dalë fituese Guza e Teutës me pesë të sakta. Në total Tirana në pesë sete ka shënuar 108 pikë, prej të cilave 70 pikë i ka bërë vetë, kurse 38 pikë kanë ardhur nga gabimet e durrsakeve, që i bie mesatarisht 7.6 pikë për set. Në krahun tjetër Teuta në pesë sete ka shënuar 99 pikë në total, prej të cilave 66 pikë vetë, kurse 33 pikë kanë ardhur nga gabimet e bardhebluve, afërsisht 6.6 pikë për set. Përfundimisht Barleti Volej – Tirana është finalja e Kupës së Shqipërisë në volejboll për femra, ndërsa pritet një ndeshje rivalësh.

The post Barleti Volej – Tirana përsëri në finalen e Kupës së Shqipërisë appeared first on Sporti Shqiptar Online.

Nga Gjergj Vyshka

Fituesve në fuqi të Kupës së Shqipërisë u ka hasur “sharra në gozhdë” përballë Teutës

Djemtë e Bardhit, jo vetëm që kanë dhuruar një ndeshje të bukur, por kanë shtangur Tiranën

Studenti – Teuta 3-1
(23-25, 25-17, 25-21, 25-21)
Studenti: Tukseferi, Kono, Rrashketa, Malaj, Vuldiev, Vasiliev, Gorenxa (L)/Qerraxhija, Muça, Memia, Çali Trajner: Y.Tomorri
Teuta: A.Dashi, J.Dashi, Nazifi, Bardhi, Moku, A.Vora, Rusi (L)/G.Vora, Biduli Trajner: L.Marangoni
Gjyqtarë: Ko.Gjoka (Tiranë), R.Kuka (Vlorë)
Asistentë : J.Sorra, K.Agolli (Tiranë)

Tirana – Farka Volej 2-3
(27-25, 20-25, 22-25, 25-23, 14-16)
Tirana: Xhija, Pashkin, Ferhati, Medenica, G.Lundra, Kola (L), Xhabrahimi/Pepaj, Ndoni, Rama, A.Lundra Trajner: A.Sako
Farka Volej: Deliu, Koçi, Bajrami, Nimani, Metani, Qepa, Bërdufi (L)/Vllaçaj, Palushi (L), Seferi Trajner: D.Bardhi
Gjyqtarë: E.Mujo, T.Zguri (Tiranë)
Asistentë: E.Zenullari, E.Braho (Tiranë)

Gjigante Farka Volej. Djemtë e Dritan Bardhit, jo vetëm që kanë dhuruar spektakël në parket dhe në shkallët e Pallatit të Sportit “Asllan Rusi”, por e kanë shtangur Tiranën e Arben Sakos. I janë përgjigjur “dhëmb për dhëmb” bardhebluve, të cilët kishin menduar se me dy përforcimet e ardhura nga jashtë Shqipërisë, pikërisht ukrainasi Pashkin dhe malazezi Medenica, jo vetëm që do të kalonin Farka Volejin, por do të ishin një rivale e fortë për Studentin. Mirëpo fundi i një loje prej më shumë se dy orësh me pesë sete dhe me shumë ankth e emocione, duke i mbërthyer të gjithë në Pallatin e Sportit “Asllan Rusi”, ka nxjerrë fitues Farka Volejin, e cila me atë formë që ka paraqitur në fushën e lojës dje ndaj bardhebluve, mund dhe duhet të jetë surprizë sot ndaj Studentit. Ajo që duhet pranuar është se fituesit në fuqi të Kupës së Shqipërisë, pra skuadra e Ylli Tomorrit, ka fituar dje ndaj Teutës falë përvojë së gjatë të të fituarit të trofeve. Sepse në të vërtetë i ka hasur “sharra në gozhdë” me durrsakët dhe mundet të kishte dhe surpriza. Por në fund ia kanë dalë. E sot pritet që të jetë një finale e ethshme për Kupën e Shqipërisë, Studenti – Farka Volej.
Studenti fiton, por heq keq
Trajneri Ylli Tomorri, ashtu sikurse ka bërë në fazën e grupeve sidomos ndaj Vllaznisë dhe Farka Volejit, dhe dje nuk e ka ndarë për asnjë çast kapitenin Elton Tukseferi. Dhe atëherë kur ka tentuar në dy momente të fuste në lojë organizatorin Çali menjëherë e ka hequr, sepse durrsakët e ngushtonin diferencën e rezultatit. Ajo që duhet përmendur është fakti se durrsakët me anë të Aldo dhe Jurgen Dashit, Nazifit dhe Bardhit, Vorës e Mokut kanë luajtur në grup dhe si një ansambël i tillë mund të kishin bërë surpriza. Në setin e parë pas avantazhit të Studentit në pushimin e parë teknik 12-11, Teuta ka arritur ta kthejë dhe për rrjedhojë nis të jetë gjithnjë në udhëheqje të rezultatit. 18-19, 19-22, 20-22, 23-25 në fund të setit të parë.

Në të dytin Studenti nuk bën më aventura, por fiton shpejt 25-17. Përsëri dhe në të tretin është në udhëheqje të rezultatit 12-11, 14-11, 18-15, 20-18 dhe në fund 25-21. I katërti ka nisur me dëshirën e madhe të Teutës për përmbysje, e cila është në avantazh deri në 14-18. Por Studenti kthen dhe fiton 25-21 e krejt ndeshjen 3-1. Pikëshënuesi më i mirë i ndeshjes është Vasiliev me 14 pikë i pasuar nga Jurgen Dashi me 13 pikë. Në bllok ka dalë fitues Bardhi me pesë mure fituese i pasuar nga Nazifi me katër mure fituese. Në shërbim me nga dy të sakta janë Vuldiev i Studentit, J.Dashi dhe Vora të Teutës. Në total Studenti në katër sete ka realizuar 98 pikë, prej të cilave 67 vetë, kurse 31 pikë kanë ardhur nga gabimet e Teutës. Në krahun tjetër Teuta në katër sete ka shënuar 84 pikë, prej të cilave 69 vetë, kurse 15 kanë ardhur nga gabimet e Studentit. Në këto kushte Teuta ka gabuar më shumë, teksa mesatarisht ka falur 7.75 pikë për set. Kurse kampionët, pavarësisht se loja e tyre nuk ka shkëlqyer shumë, ka 3.75 pikë për set. Në këto kushte, me shumë profesionalizëm dhe përvojë, Studenti ia ka dalë të jetë fitues i sfidës me Teutën.
Farka Volej mund Tiranën me lojë dhe tifozeri
Farka Volej e ka mundur Tiranën jo vetëm me lojë, por dhe me tifozëri. Mbi 100 vetë kanë mbështetur Farkën me daulle dhe me thirrje e kur është shënuar pika e gjashtëmbëdhjetë e setit të pestë, e cila i ka dhënë fitoren e gjysmëfinales skuadrës së Dritan Bardhit, kanë hyrë të gjithë në fushë dhe kanë festuar me lojtarët. Sepse për ta, për atë që kanë dhënë në fushën e lojës, janë me plot gojë heronj. Dhe sot në finale përballë Studentit pritet të jetë një Pallat Sporti më i mbushur se kurrë. Në setin e parë Farka Volej, falë lojës së Koçit dhe Qepës, arrin të shkëputet deri në 16-19.

Mirëpo Tirana di ta kthejë lojën dhe kryeson 20-19. Por vihet në ekuilibër e gjithë loja 22-22, 23-23, 24-24, 25-25. Dhe në fund Tirana shënon dy pikët e fundit dhe merr setin 27-25. E fillon bindshëm lojën Tirana në setin e dytë, teksa kryeson 4-1 dhe 12-10. Por Farka arrin të kthejë dhe e vë nën kontroll lojën. Udhëheq 16-19, 16-21, 18-23 dhe në fund 20-25. Bardheblutë i përdorin të gjithë lojtarët e stolit. Dhe për rrjedhojë në setin e tretë janë në avantazh në pushimin teknik 12-10. Por Farka nuk dorëzohet, ndërsa sërish kthen në 17-18, 17-20, 19-24 dhe në fund fiton 22-25. Seti i katërt ka nisur keq për bardheblutë, aq sa Sako detyrohet të marrë pushim në disavantazhin 8-3 për Farkën.

Dhe në fakt Tirana ka kthyer 12-11, 16-12, 20-14, 23-21 dhe në fund 25-23. Tashmë në finale. E nis Tirana mirë deri në 4-3, kthen Farka në 5-7. Dhe në avantazhin 8-7 për bardheblutë ndërrohen fushat. 11-9 për Tiranën, 11-11, 14-14 dhe dy pikët e arta të Farka Volejit i japin fitoren 3-2 kësaj skuadre dhe daljen për herë të parë në finalen e Kupës së Shqipërisë. Pikëshënuesi më i mirë i ndeshjes është Koçi i Farka Volejit me 22 pikë, i ndjekur nga Ferhati me 20 pikë, si dhe Qepa 15 pikë dhe Pashkin 14 pikë. Në bllok kanë dalë fitues me nga pesë mure fituese Koçi e Qepa. Kurse në shërbim është i saktë me pesë rezultative Koçi. Pra parë kështu njeri i ndeshjes për Farka Volejin është Redi Koçi që në total ka shënuar 32 pikë (22 me sulm, 5 me bllok, 5 me shërbim). Në pesë sete Tirana ka shënuar 108 pikë, prej të cilave 80 vetë, kurse 28 pikë kanë ardhur nga gabimet e Farka Volejit. Në krahun tjetër Farka Voleji ka shënuar 104 pikë, prej të cilave 78 vetë, kurse 26 kanë ardhur nga gabimet e bardhebluve. Dhe në fund Farka Voleji është në finale.

The post Gjigante Farka Volej, Studenti skuadër përvoje appeared first on Sporti Shqiptar Online.

Nga Gjergj Vyshka

Bardheblutë luajnë tenis me Edro Vlorën, Flamurtari e Teuta mosmarrëveshje për fushën

Skuadra e Ergys Kadiut ka hequr keq përballë studentëve të Universitetit Epoka

Nga katër ndeshje të parashikuara në javën e gjashtë të kampionatit të dymbëdhjetë kombëtar të futbollit të sallës është luajtur vetëm gjysma. Black Sheep, që tashmë është tërhequr nga gara për arsye financiare, ishte e ditur që nuk do të luante përballë Vllaznisë. Por mosmarrëveshja më e madhe ka ardhur tek ndeshja Flamurtari-Teuta. E parashikuar për t’u luajtur në ora 17:00 në Vlorë ajo nuk është zhvilluar, sepse Teuta nuk është paraqitur në Vlorë. Jo vetëm kaq, por durrsakët, të cilët nuk e dinin se duhet të shkonin në Vlorë, ishin bërë gati për ta pritur Flamurtarin në Pallatin e Sportit “Ramazan Njala”, ndërsa kishin prenotuar dhe fushën. Por as njëra dhe as tjetra. Dhe duket se ka dhe një keqinformim të të dy skuadrave nga Federata Shqiptare e Futbollit, në një kohë që duhet pritur se çfarë do të vendosë për të Komisioni i Disiplinës në FSHF.
Tirana rigjen vetveten
Tirana ka rigjetur veten, ndërsa ka bërë një ndeshje të mirë me Edro Vlorën dhe për rrjedhojë ka pasur dhe një fitore të lehtë. Edhe pse me mungesa, teksa Bylyku ka qenë i penalizuar për shkak të kartonit të kuq të marrë një javë më parë, ndërsa Nebiu e Çela kanë qenë të dëmtuar, Tirana e Angonit ka bërë një ndeshje perfekte. Mullai e Sina, por dhe Kardhashi e Gjoni kanë qenë shënuesit e golave të Tiranës, kurse ato të vlonjatëve të shënuar nga Golemi e Tajaja kanë vlejtur sa për statistikë. Në fund 7-2, ndërkohë që pranë Edro Vlorës është afruar dhe Arjan Nikolli, i rikthyer tashmë tek ky ekip, teksa do të aktivizohet në fazën e dytë.
KS Ali Demi çfarë vuajtjeje me Epokën
KS Ali Demi kurrsesi nuk mund ta mendonte se do të vuante aq shumë me skuadrën e vendit të fundit të kampionatit të futbollit të sallës, Universitetin Epoka. Skuadra e drejtuar nga ish-gjyqtari i futbollit shqiptar, Idriz Gashi, ka bërë një nga ndeshjet e saj më të mira. Rezistente, e fortë në kundërsulm dhe e meritonte të merrte qoftë dhe një barazim. Sepse KS Ali Demi duket se e kishte marrë lehtë këtë ndeshje. Është dashur tripleta e Deliallisit e më pas golat e Velit, Arapi, Ergys Kadiut, Bajollarit kanë vlejtur për të marrë fitoren. Nuk duhet harruar që KS Ali Demi nga tre penallti, pas gjashtë faulleve të shkaktuar nga kundërshtarët, ka shënuar një dhe ka humbur dy me anë të Bajollarit. Alidemsat e pranojnë që ishte një ndeshje e dobët, ndërsa Epoka me anë të tripletës së Omerit e më pas golave dopjetës së Dautovit, apo dhe golave të Gashit e Radës ia ka arritur qëllimit që ta bëjë të vuajë skuadrën kryesuese. Përgjithësisht një ndeshje e mirë dhe shumë e pëlqyer për nga niveli.

The post KS Ali Demi kryesues mes vuajtjeve, reagon Tirana appeared first on Sporti Shqiptar Online.

Nga Gjergj Vyshka

Festohet 80-vjetori i lindjes i figurës shumë dimensionale të katrorëve bardhezi

Federata jep “Çmimin e Karrierës”, Mjeshtri vlerësohet nga shumë kuadro të skakierës

Ylvi Pustina është legjenda e gjallë e shahut shqiptar. Shahisti, veteriner, arsimtar, publicist, por dhe politikan janë këto vetitë që kanë skalitur jetën e 80-vjeçarit Ylvi Pustina, të cilat dolën nga ceremonia që Federata Shqiptare e Shahut zhvilloi dje pasdite për të në ambientet e hotel “Mondialit”. Mes shumë figurave të shahut shqiptar në këtë ceremoni kanë qenë të pranishëm presidenti i Komitetit Olimpik Kombëtar Shqiptar, Viron Bezhani, drejtori i sporteve në Ministrinë e Arsimit dhe Sportit, Vladimir Gjonaj, si dhe organizatorja e ceremonisë sekretarja e përgjithshme e Federatës Shqiptare të Shahut, Majlinda Pilinci.

Florian Vila, një nga bashkohësit e Ylvi Pustinës për sa i përket karrierës në shah, ka bërë dhe një përmbledhje të karrierës së mjeshtrit të katrorëve bardhezi. Sipas Vilës. Ylvi Pustina është legjenda e gjallë e shahut shqiptar. “Ylvi Pustina është Mjeshtër i Merituar i Sportit, ndërsa më 1951 do të shpërthente si shahist cilësor në moshën 16-vjeçare. Kam qenë dëshmitar okular i asaj që ndodhte me Pustinën, ndërsa më 1952, pikërisht kur ishte 17 vjeç, ai do të ndante titullin kampion me Bujar Hoxhën, ndërsa në pesëmbëdhjetë ndeshje do të grumbullonte 13 pikë. Më 1958 kam mbetur i impresionuar nga mënyra se si luante Ylvi Pustina, nga stili i tij i veçantë. Është 9 herë kampion i Shqipërisë, është kampion kombëtar në moshën 17 vjeç. Në moshën 20 vjeç për arritjet e tij sportive do të bëhej Mjeshtër Sporti. 5 herë nënkampion i Shqipërisë, 9 herë fituesi i turneve të shahistëve më të mirë.

Pjesëmarrës në Olimpiadat Botërore, aq sa ka qenë titullar, ndërsa më 1956 në një turne me Lev Abramov në Shqipëri, Pustina do të cilësohej si më i miri ndër shqiptar. Jo vetëm kaq, por në Olimpiadën Botërore të Varnës do të merrte çmim special më 1960, ndërsa shquhej për stilin e tij kombinativ, goditjen e mprehtë, manovrat e holla rezultative. Ka marrë shumë vlerësime nga të huajt, por këtu në vendin tonë do të ishte më pas gjyqtar dhe trajner i kombëtares. Është nderi i sportit shqiptar. Ka marrë titullin “Mirënjohja e Tiranës”, titullin “Mirënjohje” nga KOKSH, si dhe disa çmime. Kemi fat që e kemi mes nesh”, ka theksuar Florian Vila.
Bezhani dhe Gjonaj vlerësojnë
Për presidentin e Komiteti Olimpik Kombëtar Shqiptar, Viron Bezhani, figura të tilla si Ylvi Pustina janë etalon për sportin shqiptar dhe janë figura që duhen mbajtur sepse kanë se çfarë mund t’i japin ende sportit në vend. “Më duhet të falënderoj kryesinë e Federatës Shqiptare të Shahut për nderin që i bën figurave, sepse janë një shembull jo vetëm për ne si KOKSH, por dhe për vetë shtetin për kujdesin që duhet të kemi karshi këtyre figurave kaq të mëdha të sportit tonë. Është një shembull për të gjithë shoqërinë dhe këta figura si Ylvi Pustina meritojnë jo vetëm Mirënjohje, por dhe më shumë. Ne vlerësojmë rrugën që Ylvi Pustina ka bërë për t’u bërë shahist. Dhe na ka zënë mat, sepse duhet të bëjmë dhe më shumë. Sot 80-vjetori i lindjes së tij që përkon dhe me 80-vjetorin e Federatës Shqiptare të Shahut. Dhe ne nuk kemi se çfarë të themi më shumë, por vetëm t’i urojmë Jetë të gjatë”.

Mandej drejtori i Sporteve në Ministrinë e Arsimit dhe Sportit, Vladimir Gjonaj, ka kujtuar vitin 1986 kur është njohur me figurat e shahut shqiptar. “ Është kënaqësi të rrish me njerëz inteligjent. Më bëhet qejfi që të shikoj në formë, sepse je i ri akoma. Suksese, shëndet dhe jetë të gjatë”. E më pas nëpërmjet një ekspozite fotografike ka kaluar e gjithë karriera e mjeshtrit Ylvi Pustina. Mandej figura të tilla të shahut si Aldo Zadrima, Ilir Seitaj, Vangjel Adhami, por dhe më i riu Oltion Vata, kanë vlerësuar Ylvi Pustinë. Ashtu sikurse e ka bërë dhe shkrimtari Çelik Petriti. E në fund është bërë dhe dorëzimi i Çmimit të karrierës dorëzuar nga Federata Shqiptare e Shahut, kurse mjeshtri Pustina, por dhe i biri Adriani kanë falënderuar të gjithë të pranishmit në 80-vjetorit e lindjes së legjendës së gjallë të shahut shqiptar.

The post Ylvi Pustina, legjenda e gjallë e shahut shqiptar appeared first on Sporti Shqiptar Online.

Nga Gjergj Vyshka

Që nga presidenti i KOKSH e deri tek drejtori i sporteve në MAS vlerësim si sport parësor

Baza materiale, lufta me pushtetin lokal, por dhe kualifikimi i sportistëve objektivat kryesor

Federata Shqiptare e Çiklizmit dje në mesditë, në ambientet e hotel “Doro Cityt” në Tiranë, ka zhvilluar analizën e saj vjetore për vitin 2014, quajtur ndryshe si asambleja e zakonshme. Me prezencën e të gjitha klubeve e shoqatave anëtare të kësaj Federate, por dhe të anëtarëve të kryesisë, çiklizmi ka analizuar gjithçka që ka bërë mirë dhe keq gjatë vitit 2014. Madje ka shpalosur dhe objektivat, që më së shumti lidhen me kualifikimin e sportistëve në Lojërave Olimpike “Rio de Zhaneiro 2016”. Duke qenë se është sporti i cili në Lojërat Olimpike Rinore, të cilat vitin e kaluar u zhvilluan në Nanjing të Kinës, por dhe në Lojërat Olimpike Evropiane në Baku gjatë këtij viti, ka qenë dhe shkon me sportistë të kualifikuar me normë, atëherë vlerësimi i sport parësor në vend ka ardhur jo vetëm nga presidenti i Komitetit Olimpik Kombëtar Shqiptar, Viron Bezhani, por dhe drejtori i sporteve në Ministrinë e Arsimit dhe Sporteve, Vladimir Gjonaj. Bezhani në fjalën e tij përshëndetëse do të vlerësonte faktin që çiklizmi është në nivele të tilla si fryt i punës së përbashket të të gjithë trajnerëve dhe sportistëve. “Keni arritur në atë nivel – ka thënë Bezhani – që e keni sjellë tashmë këtë sport në majë.

KOKSH e ka pasur në konsideratë dhe do të vazhdojë ta ketë të tillë, edhe sepse është ndër të vetmet Federata që vjen me sportistë të kualifikuar me normë. Dhe është shembull për të gjithë”. Ndërkohë për Gjonajn ka qenë e vështirë të bëjë qoka në startin e përshëndetjes, ndërsa e ka parë veten disi në pozicion të vështirë nisur nga fakti që ka qenë ish-anëtar i Komitetit Drejtues të kësaj Federate. ‘Është kënaqësi të marrësh pjesë në punimet e asamblesë së Federatës Shqiptare të Çiklizmit dhe në një farë mënyre unë jam krenar për rezultatet e këtij sporti. Madje jam krenar për kualifikimin e sportistëve me normë për në Lojërat Olimpike dhe duke qenë pjesë e kësaj Federate deri para disa kohësh, atëherë ndjej detyrimin që ta ndihmojë më shumë. Përkrahja nga Ministria e Arsimit dhe Sportit nuk ka për të munguar, ndërsa jemi munduar ta mbështesim duke pasur besim tek rezultatet e këtij sporti”, ka thënë Gjonaj.
Raporti i veprimtarive dhe financiar
Raporti i punës i Federatës Shqiptare të Çiklizmit dhe ai i financiar është mbajtur nga sekretari i përgjithshëm Alfred Tahiraj. Në raport do të theksohej puna e përbashkët, por dhe pjesa e mosmarrëshjeve dhe keqkuptimeve që kanë lindur brenda komunitetit. “Ato kanë dëmtuar rëndë jo vetëm marrëdhëniet brenda komunitetit të çiklizmit, por në mjaft raste kanë prishur dhe imazhin e Federatës Shqiptare të Çiklizmit. Ngjarjet e fundit në komunitetin e çiklizmit kërkojnë vëmëndje të veçantë në respektimin konstant të rregullores së garës, rregullores së brendshme të Federatës Shqiptare të Çiklizmit, rregullores së disiplinës dhe Kodit të Etikës së Federatës Shqiptare të Çiklizmit. Madje kërkohet respektimi i këtyre rregulloreve nga ana e të gjithë anëtarëve , të cilët duhet të respektojnë edhe detyrimet karshi Federatës Shqiptare të Çiklizmit, që kanë të bëjnë me licencimin dhe anëtarësimin brenda afateve të përcaktuara nga rregullorja e Federatës sonë dhe asaj botërore. Sepse kuotizacionet e vitit 2014 nuk janë paguar”. Më pas janë përmendur të gjitha aktivitetet kombëtare dhe ndërkombëtare të bëra gjatë vitit, si dhe janë shpalosur objektivat, të cilat ishin:

“Një nga objektivat kryesore për vitin e ardhshëm do të jetë bashkërendimi i punës me të gjitha klubet sportive dhe rajonale për promovimin dhe edukimin e rinisë nëpërmjet sportit të çiklizmit. Për këtë Federata Shqiptare e Çiklizmit do të ndihmojë në organizimin e aktiviteteve sportive me nxënësit e shkollave, si dhe të Kupave me sportistët elitar që do të financohen nga Pushteti lokal. Pasi vetëm kështu zbulojmë talentet. Jo vetëm kaq, por një objektiv është dhe pjesëmarrja në turnetë ndërkombëtar në Turqi, Malin e Zi, Bullgari, Serbi, Itali. Por objektivi kryesor është kualifikimi për në Lojërat Olimpike “Rio de Zhaneiro 2016”, ndërsa do të bëjmë të gjitha ato gara që kanë pikët e UÇI-t për t’u kualifikuar”. Në fund Tahiraj ka bërë dhe detajimin e grandit për vitin 2014, i cili ka qenë në shumën 7934652 lekë të rinj. Po kështu janë përmendur dhe aktivitetet kombëtare e ndërkombëtare.
Baza materiale dhe luftë me pushtetin vendor
Në diskutimet e tyre trajnerët e Apolonisë, Kiço Kalemi, ai i Partizanit, Pavli Karaja, i Teutës Dashamir Rama kanë ngritur shqetësimin e mungesës së bazës materiale dhe mungesën e përkrahjes së pushtetit lokal. Madje Karaja ka shkuar deri atje sa ka kërkuar një shfuqizim të një vendimi të 2012-ës, atje ku klubi i Tiranës nuk paguan me dietat për çiklistët. Mungesa e biçikletave, karburantit për stërvitje dhe për garat, por mbi të gjitha mungesa e përkrahjes nga pushteti lokal. Nëse Gjonaj deklaroi se do të mund të flasë me pushtetin lokal vetëm pas zgjedhjeve të 21 qershorit, Bezhani ka qenë më “partizan” i shkuarjes për t’u takuar me kryetarët e Bashkive aktual që të përkrahin çiklizmin. “Ka qenë një praktikë e keqe që gjithçka ia kërkoni Federatës. Duhet të luftoni më shumë me pushtetin lokal, ndërsa duhet të jeni të bindur që me ndarjen e re territoriale, apo shkurtimin e pagesave për kryetarët e komunave, edhe sporti do të ketë më shumë para. E vërteta është se janë 38 Federata dhe buxheti është më i madh, por duhet të dini që e kemi bërë ndarjen ashtu siç e kemi gjykuar. Është e vërtetë që pjesën e “luanit” nëpër pushtete lokale e merr futbolli, por ju duhet të luftoni, sepse keni një shembull konkret si Kiço Kalemi, që e ka pasur gjithnjëm mbështetje Bashkinë”. Kurse Bezhani ka premtuar jo vetëm kursin për trajner e gjyqtar, por dhe idenë e Donald Mukajt futjen e çiklizmit si lëndë mësimore në Universitetin e Sporteve. “Ju rrisni masivizimin, pa do të dimë të marrim dhe fond të veçantë, sepse si presidenti i KOKSH, ashtu dhe drejtori i sporteve në MAS janë miqtë tanë. Dhe jo vetëm kaq, por duhet të gjithë me uniformë dhe të mos jemi më laro-baro që nga gara e parë më 28 shkurt e deri në fund”, ka mbyllur Anxhaku, kurse asambleja e zakonshme e Federatës Shqiptare të Çiklizmit në të cilën ka marrë pjesë dhe deputeti i PDIU-t, Tahir Muhedini, është mbyllur në një kohë rekord jo më shumë se 90 minuta.

The post Çiklizmi analizon 2014-ën, 2015-ta sulm për Olimpiadë appeared first on Sporti Shqiptar Online.

Nga Edmond Duraku

Edhe për këtë sezon, skuadra e periferikëve të kryeqytetit pretendon titullin kampion

Skuadra e trajneri Muhametaj ka bërë tripletë trofesh; kampionat, Kupë Shqipërisë, Superkupë

Kamza Basket, e cila sot është një histori e bukur e basketbollit shqiptar, teksa ka marrë një titull kampion, dy Kupa të Shqipërisë dhe tre Superkupa të Shqipërisë, është krijuar më 2010-ën. Dhe ka ardhur si një dëshirë e madhe e drejtuesve të Bashkisë dhe mbështetjes morale të komunitetit për ta zhvilluar dhe zgjeruar sportin në të gjitha hallkat e veta. Dhe në shtator të vitit 2010 u ndërmorën nisma konkrete dhe u arrit marrëveshja me shoqatën Valbona Basket që ekipi i basketbollit Valbona, një ndër më të dëgjuarat në vend dhe me shumë trofe kombëtar, të përfaqësojë Bashkinë Kamëz me emrin Kamza Basket në Kampionatin Kombëtar. Ai ofroi një staf cilësor, i cili nga mbështetja ekonomike e Bashkisë arriti që në fazën e parë të renditej në vendin e tretë në pikë të barabarta me vendin e dytë. Duke parë mbështetjen që dha në komunitet, po punohet që edhe sivjet ky ekip të arrijë nivelet më të larta.
Rrugët e suksesit të Kamza Basket
Qyteti i Kamzës, në vitet e fundit, ka njohur ndryshime të mëdha dhe të suksesshme në shumë fusha. Dhe një ndër ato në të cilën ka korrur suksese është dhe basketbolli për meshkuj një fushë e cila ka korrur vetëm suksese gjatë këtyre viteve në Kamëz është sporti i basketbollit. Që në fillimet e veta Kamza Basket u projektua si ekip kampion nga kryetari i Bashkisë Kamëz, Xhelal Mziu. Dhe kjo falë me mbështetjes së vazhdueshme që i ka dhënë dhe vazhdon t’i japë sportit të basketbollit. Ndeshje pas ndeshjeje, Kamza Basket është munduar që t’ia shpërblejë investimin e bërë kryebashkiakut Mziu, si dhe ka hyrë shumë shpejt në zemrat e sportdashësve kamzalinj, të cilët e kanë mbështetur vazhdimisht.

Arkitekti i sukseseve të njëpasnjëshme të këtij ekipi fluturues është trajneri i mirënjohur Adem Muhametaj. Me punën e palodhshme të bërë nga Muhametaj dhe me përkushtimin maksimal të basketbollistëve, gjatë këtyre viteve, sporti i koshit në Kamëz ka njohur vetëm suksese. Kamza Basket është ekipi i tripletës, sepse është fituese tri herë radhazi e Superkupës së Shqipërisë. E vite më parë e ka përfunduar kampionatin me 22 fitore dhe pa asnjë humbje.
Sukseset e arritura nga viti 2010 deri në fillim të 2015-ës
Përkushtimi maksimal gjatë stërvitjes dhe në çdo ndeshje i basketbollistëve të Kamzës shpërblehet me fitimin e trofeut të parë që daton në vitin 2012. Kamza Basket për meshkuj, pas një faze të parë të shkëlqyer me grumbullimin e pikëve të plota, triumfon në finalen e Kupës së Shqipërisë ndaj Vllaznisë në pallatin e sportit “Asllan Rusi”, me rezultat të thellë 82-67 në favor të tyre dhe shpallet për herë të parë në historinë e saj fituese e Kupës së Shqipërisë. Ky është trofeu i parë në rrugën e gjatë të sukseseve të tjera që do të korrnin basketbollistët e Kamzës. Kamza Basket nuk ka të ndalur dhe vazhdon rrugën e saj të suksesit duke shkruar historinë e saj në sportin e basketbollit.

Viti 2013 njihet si viti i tripletës, pasi është viti i artë dhe i jashtëzakonshëm për Kamza Basket e mbështetur vazhdimisht nga kryebashkiaku Mziu dhe e drejtuar nga arkitekti Muhametaj. Në muajin janar të këtij viti fitojnë trofeun e dytë, ndërsa shpallen fituesit e Superkupës së Shqipërisë në basketboll, duke mundur Shoqatën Tirana, me rezultatin 80-71. Përveç Kupës, edhe Superkupa e Shqipërisë bëhet “pronë” e kamzalinjve. Me fitimin edhe të Superkupës së Shqipërisë, Kamza Basket nuk njeh rival. Gjatë vitit 2013 shpallen edhe kampionë të Shqipërisë.

Trofeu i tretë dhe më i rëndësishmi i sezonit për këtë skuadër me histori trevjeçare; tri ndeshje finale, të tria të fituara, ndërsa fjala tripletë shoqëron kështu mozaikun e sukseseve të paralajmëruara që në fillim të sezonit. Projekti i ndërtimit të ekipit të basketbollit për meshkuj, nismë e kryebashkiakut Xhelal Mziu dhe e trajnerit Adem Muhametaj, ka dhënë frytet te veta, me rekordet e njëpasnjëshme gjatë këtij viti. Një sezon që nuk ka njohur asnjë rival, duke mos pësuar asnjë humbje. Tashmë basketbollistët e Kamza Basket janë mbretërit e trofeve.

Tjetër rekord në basketbollin shqiptar i shënuar nga Kamza Basket për meshkuj është se e ka mbyllur sezonin 2012-2013 pa asnjë humbje. Gjatë 22 ndeshjeve të zhvilluara në dy fazat e kampionatit, djemtë e trajnerit Muhametaj vetëm fitore kanë njohur, pra 22 ndeshje të zhvilluara në kampionat kanë arritur 22 fitore. Ishte një grup i shkëlqyer lojtarësh që shkruan historinë për qytetin e gjashtë të vendit, duke shënuar një sukses të jashtëzakonshëm në basketboll. Ndërkohë që në janarin e vitit 2014, teksa kanë mundur Vllazninë 90-81, për herë të dytë do të fitonin Superkupën e Shqipërisë.

Këtë vit, me fillimin e vitit 2015, fituan një tjetër trofe të rëndësishëm, siç është përsëri Superkupa e Shqipërisë, trofe të cilën e fituan për herën e tretë radhazi, duke mposhtur përsëri Vllazninë së Shkodrës dhe duke i dhënë leksion në basketboll. Pra edhe për vitin 2015 basketbollistët e Kamzës e shënuan emrin me germa të arta në librin e trofeve në basketbollin shqiptar. Gjithsej Kamza Basket e ka shënuar emrin e saj në librin e artë të trofeve të basketbollit shqiptar 5 herë, pasi ka fituar 5 trofe: ka fituar Kupën, Kampionatin dhe tri herë radhazi Superkupën e Shqipërisë. Tripletë kanë bërë vetëm Partizani, Tirana, Valbona dhe së fundmi Kamza Basket. Asnjë ekip tjetër përveç këtyre skuadrave s’ka bërë tripletë. Krahas fitoreve sportive, kjo skuadër ka fituar edhe respektin e sportdashësve jo vetëm të kamzalinjve, por anembanë vendit.
Infrastruktura
Por sezoni 2012-2013 ka shënuar edhe “fitore” në mjediset apo infrastrukturën sportive, çfarë ka ndikuar jo pak në suksesin e tripletës. Palestra e re e Bathores është tashmë arena e kampionëve të Shqipërisë. Ajo i plotëson kushtet jo vetëm për të zhvilluar ndeshjet të Kampionatit Kombëtar të Shqipërisë, por edhe ndeshjet kombëtare dhe ndërkombëtare. Basketbollistët e Kamza Basket e përurojnë palestrën më moderne në Shqipëri me një fitore që në ndeshjen e parë të luajtur në këtë palestër ndaj ekipit të Teutës. Më shumë se fitores, kamzalinjtë i janë gëzuar sallës së re sportive, investim madhështor i Bashkisë Kamëz. Përveç ekipit të parë, kryebashkiaku Mziu u ka kushtuar vëmendje edhe brezave të rinj, në nxjerrjen e talenteve që në të ardhmen mund të jenë lojtarë kyç të ekipit të parë. Prandaj gjatë vitit 2014 është krijuar ekipi Kamza Basket për të rinj, i cili ka marrë pjesë menjëherë në kampionatin kombëtar. Ky ekip ka në përbërjen e vet djem të qytetit të Kamzës, të talentuar, që premtojnë shumë për të ardhmen, jo vetëm për ekipin e Kamzës, por edhe për ekipin kombëtar të basketbollit.

Kryebashkiaku Mziu u ka dhënë mbështetje ekipeve të Kamzës në basketboll, duke zhvilluar takime të shpeshta me ta, duke u dhënë mbështetje të vazhdueshme, pasi ata kanë qenë imazhi pozitiv i qytetit të Kamzës. Edhe për vitin 2015, ekipi i Kamza Basket synon titullin kampion si çdo vit tjetër, pasi ka në organikën e saj lojtarë me shumë përvojë, madje edhe lojtarë të ekipit kombëtar, të ndërthurur me talentët e rinj.

Kanë thënë për Kamza Basket
Xhelal Mziu (Kryetari i Bashkisë) – “Keni ngritur imazhin e qytetit, duke nxitur të rinjtë për t’u marrë me sport. Përshëndes përzemërsisht gjithsecilin për aspektin profesional, por edhe për motivimin e tuaj që keni dhënë për qytetin e Kamzë. Ju jeni imazhi pozitiv i qytetit të Kamzës”
Myqerem Tafaj (deputet) – “Përgëzoj kryetarin e Bashkisë për mbështetjen që i ka dhënë sportit të basketbollit”
Avni Ponari (Presidenti i Federatës Shqiptare të Basketbollit) – “Është një arritje e shkëlqyer e djemve të Kamzës, të cilët për herë të parë ngrenë një trofe të tillë”
Adem Muhametaj (Trajneri i Kamza Basket) – “Falënderim i madh Bashkisë Kamëz, e cila ka qenë vazhdimisht një nga mbështetëset kryesore”.
Afrim Bilali (ish-kapiteni i skuadrës) – “Ju premtoj edhe në emër të djemve të tjerë që kjo nuk do të jetë kupa e fundit, por vetëm fillimi i një historie të gjatë kupash”
Fatjon Gjoka (lojtar) – “Mbështetja për basketbollin duhet të vijë nga të gjithë. Është shumë e nevojshme nga Federata, bashkitë përkatëse, siç bën Bashkia Kamëz”
Bruno Hoxha (lojtar) – “Bashkia një nga mbështetësit kryesorë të Kamza Basket na motivon në luftën drejt titullit. Kalimi tek ekipi i Kamzës ishte një hap i rëndësishëm në karrierën time”.

Disa nga fitoret me mbi 100 pikë të arritura nga Kamza Basket
1. Kamza Basket – Apolonia 119-52 (67 pikë epërsi) 22 nëntor 2014
2. Kamza Basket – Skënderbeu 126-62 (64 pikë epërsi) 6 nëntor 2012
3. Apolonia – Kamza Basket 57-116 (59 pikë epërsi) 25 nëntor 2013
4. Elbasani – Kamza Basket 53-110 (57 pikë epërsi) 20 tetor 2013
5. Kamza Basket -UAT 102-47 (55 pikë epërsi) 4 tetor 2013
6. Kamza Basket – Teuta 126-73 (53 pikë epërsi) 15 nëntor 2013
7. Kamza Basket – Apolonia 118-74 (44 pikë epërsi) 13 prill 2013
8. Tirana – Basket Kamza 70-107 (37 pikë epërsi) 23 nëntor 2011

Disa nga fitoret me diferencë të madhe pikësh
1. Kamza Basket – UAT 102-47 (55 pikë epërsi)
2. Kamza Basket – Apolonia 95-70 (25 pikë epërsi)
3. Kamza Basket – Teuta 126-73 (53 pikë epërsi)
4. Elbasani – Kamza Basket 48-80 (32 pikë epërsi)
5. Kamza Basket – Shoqata Tirana 81-58 (23 pikë epërsi)
6. Apolonia – Kamza Basket 57-116 (59 pikë epërsi)
7. Elbasani – Kamza Basket 53-110 (57 pikë epërsi)
8. Kamza Basket – UAT 86-52 (34 pikë epërsi)
9. Partizani – Kamza Basket 67-99 (32 pikë epërsi)
10. Kamza Basket – Partizani 76-37 (39 pikë epërsi)
11. Kamza Basket – Apolonia 118-74 (44 pikë epërsi)
12. Kamza Basket – Apolonia 96-54 (42 pikë epërsi)
13. Klub Tirana – Kamza Basket 63-95 (32 pikë epërsi)
14. Kamza Basket – Skënderbeu 126-62 (64 pikë epërsi)
15. Tirana – Basket Kamza 107-70 (37 pikë epërsi)
16. Kamza Basket – Apolonia 119-52 (67 pikë epërsi)
17. Kamza Basket – Elbasani 102-65 (37 pikë epërsi)

The post Kamza Basket, një histori e bukur e basketbollit shqiptar appeared first on Sporti Shqiptar Online.

Nga Gjergj Vyshka

Përfaqësuesja e volejbollit për vajza rikthehet në parket pas dy vjetësh mungesë mbledhjeje

Gurabardhi: Kanë munguar për arsye dëmtimi Thaka e Vokrri, ndërsa Bego s’ka pasur mundësi të vijë

Pas dy vjetësh mungesë, që nga koha e pjesëmarrjes në kualifikueset e Kampionatit Evropian në maj 2013, kombëtarja e volejbollit të femrave është mbledhur dje në sallën Nr.2 të Pallatit të Sportit “Asllan Rusi”. Nën drejtimin e trajnerit Hasan Gurabardhi dhe ndihmësit të tij Altin Martiro, kuqezinjtë e rrjetës për femra ka zhvilluar stërvitjen e saj të parë. Madje gjithçka ka qenë nën vëzhgimin e sekretarit të përgjithshëm të Federatës Shqiptare të Volejbollit, Leonard Tase, dhe anëtarit të kryesisë Albenc Vokopola.

Por në këtë grumbullim të kombëtares kanë qenë të pranishëm dhe mjeshtri i rrjetës dinamovite dhe asaj shqiptare Vangjel Koja, si dhe specialistët Vasil Binga dhe Hazbi Kotoni. Pa harruar që kanë qenë edhe familjarë të lojtarëve, apo dhe president klubesh. Sikurse ka qenë edhe trajneri i Flamurtarit në volejboll për femra, Todi Driza, sepse kanë ardhur në këtë grumbullim dy lojtare të datëlindjes 1997. Bëhet fjalë dhe Isaraj dhe Çaushaj. Fillimisht me skuadrën ka folur trajneri Gurabardhi dhe ndihmësi i tij Martiri. Por më pas dhe sekretari i përgjithshëm i Federatës Shqiptare të Volejbollit, Leonard Tase.
Stërvitja
E gjithë seanca stërvitore e ekipit kombëtar të rrjetës shqiptare ka zgjatur rreth dy orë. Ka nisur me një nxehje të mirë. Më pas është kaluar në disa veprime taktike e teknike. Për të kaluar më pas në një lojë, e cila në fakt është gjykuar nga arbitri i njohur Fatos Mujo. Ajo që ra në sy ka qenë fakti se mjeshtri i rrjetës dinamovite Vangjel Koja është marrë posaçërisht me Bicin, pa harruar dhe lojtaret e reja. Në përfundim është thënë se do të ketë dhe grumbullime të tjera.
Fjala e Gurabardhit
“Ky nuk do të jetë grumbullimi i vetëm i kombëtares sonë. Pas dy javësh do të kemi një tjetër, atje ku do të bëhen matjet e kërkuara nga loja e volejbollit, si dhe analizat mjekësore, të cilat do të zhvillohen në laboratorin mjekësor të Universitetit të Sporteve. Dhe si të tilla ne do t’i mbajmë dy ditë lojtaret. Kanë munguar për arsye dëmtimi Thaka dhe Vokrri, madje kjo e fundit ka shkuar në Itali sepse dyshohet për hernie di skale. Po kështu nuk ka ardhur për arsye e veta dhe për pamundësi të tjera Bego e Skënderbeut.

Më duhet të them që është parashikuar vajtja në maj në turneun ndërkombëtar të Barit, atje ku do të marrim pjesë si përfaqësuese. Është një grup shumë i mirë lojtaresh, të cilat sezonin e ardhshëm në kualifikueset e Evropianit do të dinë të bëjnë mrekullinë. Si stërvitje jam i kënaqur, sepse të gjitha lojtaret kanë treguar nivel”, ka përfunduar Gurabardhi, ndërsa kështu ka përfunduar seleksionimi i parë i kombëtares së volejbollit të femrave.

The post Grumbullohet kombëtarja, në maj në turneun e Barit…! appeared first on Sporti Shqiptar Online.

Absurdi

Historia e qenve rrugaçë në ish-kompleksin Dinamo nuk është krejt e panjohur. Jo vetëm për ato që në të gjitha disiplinat kanë veshur fanellën blu, por dhe për banorët që kanë jetuar rreth kompleksit. Madje qentë që qëndronin në kompleks janë ushqyer dikur dhe nga ato që mbesnin nga kuzhina e Dinamos. Por sot duket se janë kthyer në një shqetësim të madh. Nëse muaj më parë, të paktën dy herë, në një media sportive paralajmërohej që qentë e kompleksit bëheshin pengesë për zhvillimin e ndeshjes të moshave, sot ka një tjetër histori. Të mërkurën në mëngjes, të paktën siç dhe ka treguar për Gazetën e Sportit drejtori i Agjencisë së Shërbimit të Sporteve, Bledar Doçi, ka mbërritur një kamera e Fiks Fare pikërisht për qentë e kompleksit.

“Unë kisha telefonuar dhe më parë Bashkinë e Tiranës që të merrte masa për këta qenë rrugaçë. Dje i kam dërguar një shkresë zyrtare që t’i zhdukin, sepse janë shqetësim për të gjithë. Kështu që për zhdukjen e tyre nuk është më kompetencë e Agjencisë së Shërbimit të Sporteve”. E në këto kushte, qentë e kompleksit duket se po kthehen në një çështje që është për të qeshur e për të qarë, por që duket se nuk ka më lidhje me sportin. Sepse në një kompleks që bëhet sport nuk është normale të ketë aq shumë qenë rrugaçë.

The post Qentë e kompleksit, Agjencia e Sporteve letër Bashkisë: Zhdukini appeared first on Sporti Shqiptar Online.

nia

Nga Gjergj Vyshka

Partizani, edhe pse ka shkuar deri në dhjetë pikë avantazh, s’e ka mbajtur dot ritmin

Vetëm pas dy periodave të dyta, kuqeblutë e Gjeçajt ia kanë dalë të jenë fitues me të kuqtë

Partizani – Vllaznia 76-87
(19-20, 27-17, 15-28, 15-22)
Partizani: Gozhdari, Çaçi (18), Pregja (7), Ismeti (32), Fjolla/Merkaj (16), Pylla, Kristo (3) Trajner: E.Ismeti
Vllaznia: Ndoja (20), Bërdica (10), Gavraniç (23), Rakaj (2), Huti (8)/Shaqiri, Bekteshi (2), Shabani (6), Taraboshi (5), Faslija (11) Trajner: B.Gjeçaj
Gjyqtarë: G.Cici, G.Shaqiri (Tiranë), M.Kasëmi (Vlorë)
Vllaznia i është bashkuar kreut të renditjes në basketboll për meshkuj, që aktualisht, edhe për shkak të koshaverazhit më të mirë se shkodranët, por dhe fitores në ndeshjen direkte në Shkodër, mbahet nga Tirana. Në fakt ajo që duhet theksuar është fakti se shkodranët kanë pasur vështirësi për të fituar me Partizanin, edhe sepse kanë pasur mungesa në formacion, ndërsa për arsye dëmtimi nuk kanë qenë të pranishëm Llazani dhe Arra. Por në të njëjtën kohë dhe hyrja me vonesë në parket, sepse tani u rikonstruktua për herë të dytë parketi i Pallatit të Sportit “Qazim Dervishi”, jo pak e ka penalizuar Vllazninë.

Nëse kanë fituar dje shkodranët gjithçka ka ardhur nga fakti se Partizani nuk e ka mbajtur ritmin që duhej dhe kur ishte me një diferencë prej 10 pikësh avantazh. Madje duket sikur krijohej përshtypja që të kuqtë, edhe pse Florian Ismeti dhe Kujtim Çaçi kanë qenë më të mirët, pas tyre dhe Merkaj me tripikëshat e tij, nuk kanë pasur besimin në vetvete se mund të fitonin me kampionët. Çka do të ishte më e bukur për garën e kampionatit.
Ndeshja – Në periodën e parë, Vllaznia ka kryesuar fillimisht, por Partizanin ndiqte. Madje pas barazimit 14-14, të kuqtë janë shkëputur deri në 19-14. Por Gavraniç bëhet faktor dhe fundi i periodës së parë shënon shifrat 19-20 për kuqeblutë. E dyta është më e mira për Partizanin, që ka fituar 27-17 dhe në pushim ka shkuar me avantazhin 46-37. Madje forma e mirë e të kuqve ka vazhduar deri në diferencën 51-41. Një dëmtim momental i Ismetit dhe dalja e tij për t’u qetësuar ka prishur punë. Pasi Vllaznia jo vetëm që ka filluar të ngushtojë, por dhe ka kaluar në avantazh, derisa në fund të periodës së tretë është në avantazh 61-65.

Avantazh që ka ardhur duke u thelluar në periodën e katërt dhe në fund ka një fitore 87-76 për Vllazninë. Për t’u evidentuar një përplasje mes Taraboshit e Gozhdarit, që gjyqtari Cici i ka kaluar të dy me gabim teknik. Për të kuqtë ka rënduar më shumë ky gabim teknik, pasi ka qenë faulli i pestë i Gozhdarit, që do të thotë një minimizim i forcave për të kuqtë. E për rrjedhojë, Vllaznia, edhe pse ka pasur vështirësi, ka ditur të fitojë e të kryesojë së bashku me Tiranën të paktën për një ditë.
Atmosfera – Dikur Partizani e Vllaznia kanë qenë rivale të denja për titull kampion e për Kupat e Shqipërisë, apo dhe për çdo trofe qëvendosej. Aq sa të futeshe në Pallatin e Sportit “Partizani”, sot “Asllan Rusi”, apo në Shkodër, duheshin radhë të gjata e kordone të shumta policie për të kaluar. Por sot? Në Pallatin e Sportit “Asllan Rusi” nuk kanë qenë më shumë se sa 10-15 vetë, që janë numëruar me gishta e dorës. Jo vetëm kaq, por vetëm dy policë, kamerat e Telesportit dhe drejtuesit e Federatës Shqiptare të Basketbollit e Pingpongut. Këta dy të fundit janë shkodranë e për rrjedhojë e kanë ende nostalgjinë e atyre viteve kur luhej me një pallat të mbushur plot e përplot.

Të paktën Korab Llazani, sekretari i përgjithshëm i Federatës Shqiptare të Basketbollit, ish-lojtar i Vllaznisë e ndjen zbrazëtinë e Pallatit të Sportit. Ashtu sikurse e ndjen në tërësi basketbolli, sepse edhe për shkak të kushteve mizerrabël në “Asllan Rusi”, por dhe për shkak të nivelit të koshit shqiptar, Partizani-Vllaznia, një duel historik, kalon sikur të ishte një ndeshje e rëndomtë. Por përtej kësaj atmosfere të ftohtë, sikurse ofron salla kryesore e Pallatit të Sportit “Asllan Rusi”, Vllaznia ia ka dalë të jetë fituese me Partizanin.

The post Vllaznia i bashkohet kreut, ka përsëri vështirësi appeared first on Sporti Shqiptar Online.

Nga Gjergj Vyshka

Lojtarët tiranas janë vënë në garë me njëri-tjetrin kush e kush të shënonte më shumë

Bardheblutë e Angonit, duke përfituar nga pushimi i Flamurtarit, gdhijnë në krye

Tirana – Teuta 13-4
Tirana: Enesi, Sina, Bylyku, Mullai, Voga/H.Hoxha, Lika, Xhaferraj Trajner: A.Angoni
Teuta: Priu, Haçkovija, I.Bllaca, Rigo, Hoti/Mustafaraj Trajner: O.Gushaj
Gjyqtarë: K.Hakrama, S.Minxholli (Tiranë)
Karton i verdhë: Bylyku
Shënues: Sina 2’, 33’, 35’, 36’, Bylyku 13’, 15’, 24’, Xhaferraj 19’, 38’, 39’, Mullai 26’, Voga 40’, 40’/I.Bllaca 12’, Hoti 14’, Haçkovija 23’, 34’
Tirana shpërthen në Pallatin e Sportit “Asllan Rusi”, teksa ka shënuar trembëdhjetë gola në portën durrsake. Një ndeshje pa shumë vlera, sepse Teuta është paraqitur me vetëm gjashtë lojtarë, pesë në formacion dhe një rezervë, kurse mungesa e Fisnik Bllacës për shkak dëmtimi duket se ka qenë evidente në lojën e “djemve të detit”. Haçkovija ka qenë shumë pak për t’i bërë rezistencë Tiranës, e nëse do të kishte më shumë kohë në dispozicion do të mund të kishte shënuar dhe më shumë se 13 gola. Teuta ka rezistuar deri në barazimin 2-2 e më pas ka ardhur rënia e saj.

Bylyku, Sina, Xhaferraj bëhen shtysë për të tjerët për të shënuar në portën e Teutës, ndërsa Mullai e Voga kanë vulosur rezultatin 13-4. Ka shënuar dy gola Haçkovija, këto krahas Ivi Bllacës dhe Hotit, por të gjitha këto gola të durrsakëve kanë vlejtur për statistikë. Ndërkohë ajo që duhet thënë është fakti se ndeshja ka nisur me gati 30 minuta vonesë, sepse përgjatë gjithë ditës, në sallën kryesore të Pallatit të Sportit “Asllan Rusi”, kanë qenë “Dëshmitarët e Jehovait”.

E jo vetëm kaq, por gjatë pjesës së dytë, teksa kishin mbetur dhe 11 minuta lojë, ka pasur dhe një bllokim të tabelës elektronike, e cila e ka detyruar ndërkombëtarin Hakrama që të vendosë orën në dorë për të mbajtur kohën. Megjithatë përtej këtyre defekteve, në përgjithësi ka qenë një ndeshje e qetë, pas së cilës ka ardhur dhe fitorja e thellë e Tiranës, 13-4. Bardheblutë janë në krye, sepse Flamurtari e ka shtyrë ndeshjen e tij në Shkodër për shkak të angazhimit në Kupën “Adem Jashari”, kurse KS Ali Demi ka rënë për herë të dytë në këtë kampionat, teksa është mundur 4-1 nga Edro Vlora.

The post Shpërthen Tirana, KS Ali Demi rrëzohet në Vlorë appeared first on Sporti Shqiptar Online.